٭۔۔ایہہ بچیاں نوں لفظ ضرور دسیو۔۔ ٭
تارا میرا کِنّوں تے رسونت کیہنوں کہندے نیں،
لاناں کیہنوں آکھدے تے اؤنت کیہنوں کہندے نیں!
ہندی کی نموشی تے فتور دسیو،
ایہے بچیاں نوں لفظ ضرور دسیو!
ڈوکا کینہوں آکھدے تے بولی کیہنوں کہندے نیں
ہندا کی اے بروو تے پوہلی کیہنوں کہندے نیں،
ہندی کی سڑنگھ تے سلامبھا کیہنوں کہندے نیں،
وڈیائی کی ہوندی تے الانبھا کیہنوں کہندے نیں!
نھیرناں،گندھوئی تے زمور دسیو،
ایہے بچیاں نوں لفظ ضرور دسیو!
دادے، نانکے، پتیئس ، پتیوئرے دسیو
کُڑم، شریکے، پیکے ، سوہرے دسیو
دنداسا، نتھّ، سرمہ تے متھے لٹ دسیو
پھاٹھ، ڈنگوترے، مراسی جاٹ نٹّ دسیو
چھمبھ، ٹوبھا کھوہ تے سانبھ کے تلاب رکھیو
آؤندی پیڑھی جوگاسانبھ کے پنجاب رکھیو
پٹنا، چمکور، سرہند، ماچھیواڑا دسیو
چھنجھ، کشتی، بازی تے اکھاڑا دسیو
ہساؤنی، کہانی، ساکھیاں بات دسیو
ترکالاں، لوہڈھا، منہ نیہرا، پربھات دسیو
کہی، رمبی، تنگلی، جندرا، سلنگھ دسیو
پیڑھی ، منجا، موہڑا تے پلنگھ دسیو
سبھراؤ، مدکی، چیتے کھدرانا ڈھاب رکھیو
آؤندی پیڑھی جوگاسانبھ کے پنجاب رکھیو
ٹھکّا پچّھوں تے پُرے دی پونڈ دسیو
دُلّا جگا جیونا سانو کون دسیو
گلوٹا چھکّو پونی کھڈی تانی دسیو
جپ رہ راس سوھیلا انند بانی دسیو
لیھا پَکھڑا سونڑاں سانبھ کے گلاب رکھیو
آؤندی پیڑھی جوگاسانبھ کے پنجاب رکھیو
رُگ تھبّی ستھری تے پنڈ دسیو
نکھٹٗا چھڑا دھاجّو تے نالے رنڈ دسیو
ٹپے سِٹھنی گھوڑیاں سہاگ دسیو
ڈپٹہ چنی پھلکاریاں تے باگ دسیو
تہاڈ اک تارا تے سانبھ کے رباب رکھیو
آؤندی پیڑھی جوگاسانبھ کے پنجاب رکھیو
پیچون کھدو بارہ ٹہنی کھیڈ دسیو
دھوڑ جپّھہ کینچی پنڈی ریڈ دسیو
گپّھا بُک مُٹھ نالے اوک دسیو
پٹھ لیلا بلونگڑا تے بوک دسیو
وِگھے مربعے تے کلّے دا حساب رکھیو
آؤندی پیڑھی جوگاسانبھ کے پنجاب رکھیو
کلکاری، چیک، دہاڑ تے بڑک دسیو
چوز، اڑکھ، نخرہ تے مڑھک دسیو
پیہلاں، توتیاں ، نمولیاں ،بیر دسیو
پنسیری ، اَدھ پا، پائیا نالے سیر دسیو
لگام، کاٹھی پیراں 'چ رکاب رکھیو
آؤندی پیڑھی جوگا سانبھ کے پنجاب رکھیو
لٹھا ، ڈھبی، کھدر تے ململ دسیو
پر ، پرسوں ،بھلک تے نالے کل دسیو
پنجہ، جیتو، ننکانہ، نیلا تارہ دسیو
توی، چرکھڑی، دیگ دا نظارہ دسیو
چیتے پھولا، نلوآ، کپور تےنواب رکھیو
آؤندی پیڑھی جوگاسانبھ کے پنجاب رکھیو
جنڈ ، ون، شریں تے ساگوان دسیو
لوک تتھّ، محاورے تے اَکھان دسیو
ساہل، گنیاں، رندا، کرنڈی، تیسی دسیو
بھورا، کمبل ، لوئی نالے کھیسی دسیو
مٹھے بول ویر، بھاجی تے جناب دسیو
آؤندی پیڑھی جوگا سانبھ کے پنجاب رکھیو
پورن کنہیا جیتا بدّھو شاد دسیو
بیہی گلی ڈندا کچا راہ دسیو
پیلو وارث ہاشم تے قادر یار دسیو
لال تیجے گنگو کرپال جہے گدار دسیو
ڈیرے سادھ بابے بے نقاب رکھیو
آؤندی پیڑھی جوگا سانبھ کے پنجاب رکھیو۔۔!
دھریک،لسوڑا تے دھتور دسیو،
ایہے بچیاں نوں لفظ ضرور دسیو!
لانگا کیہنوں آکھدے تے کھوری کیہنوں کہندے نیں،
چوبر کیہنوں آکھدے تے گھوری کیہنوں کہندے نیں!
ہندا کی جوانی دا سرور دسیو،
ایہے بچیاں نوں لفظ ضرور دسیو!
سانبھ چوری، تیر ،گھڑا ،پٹّ دا کباب رکھیو
آؤندی پیڑھی جوگا سانبھ کے پنجاب رکھیو۔۔!
٭٭٭٭٭٭٭٭٭٭٭٭
کوئی تبصرے نہیں:
ایک تبصرہ شائع کریں