Pages

میرے چاروں طرف افق ہے جو ایک پردہء سیمیں کی طرح فضائے بسیط میں پھیلا ہوا ہے،واقعات مستقبل کے افق سے نمودار ہو کر ماضی کے افق میں چلے جاتے ہیں،لیکن گم نہیں ہوتے،موقع محل،اسے واپس تحت الشعور سے شعور میں لے آتا ہے، شعور انسانی افق ہے،جس سے جھانک کر وہ مستقبل کےآئینہ ادراک میں دیکھتا ہے ۔
دوستو ! اُفق کے پار سب دیکھتے ہیں ۔ لیکن توجہ نہیں دیتے۔ آپ کی توجہ مبذول کروانے کے لئے "اُفق کے پار" یا میرے دیگر بلاگ کے،جملہ حقوق محفوظ نہیں ۔ پوسٹ ہونے کے بعد یہ آپ کے ہوئے ، آپ انہیں کہیں بھی کاپی پیسٹ کر سکتے ہیں ، کسی اجازت کی ضرورت نہیں !( مہاجرزادہ)

بدھ، 29 مارچ، 2017

ایسٹ تِمور ۔ عطارو جزیرہ کی سیر

٭٭٭٭٭٭٭٭٭٭٭٭٭٭
25/03/2017 اتوار آج ہمارا پروگرام عطارو جزیرے پر جانے کا تھا ۔جس کا دیلی سے فاصلہ 42 کلومیٹر تھا ۔ یہاں سے ایک بڑا جہاز برلن نکرومہ ، جب یہ آیا ہوگا تو اِس کی حالت ، اچھی تھی ، مگر اب یہ بُری حالت میں ہفتہ اور اتوار کو چلتا ہے ۔ بلکہ یوں سمجھو کہ ، صرف ہفتہ اور اتوار کو ٹورسٹ کو لے کر جاتا ہے ۔ 
اور دوسری درمیانے سائز کی بوٹ ڈریگن سٹار عطارو جاتی ہے . ایک دن پہلے بکنگ کرائی ، ڈریگن سٹار کے چار کمپارٹمنٹ ہیں ، وی آئی پی ، ٹورسٹ ، فیملی اور تیموری ورکرز ، کرایہ بالترتیب ، 25، 15، 10 اور 5 ڈالر ہے بوٹ صبح 8 بجے روانہ ہوکر واپس ڈیڑھ بجے سے تین بجے کے درمیان موسم کے مطابق واپس آتی ہے ،
وی آئی پی ، کلاس کا ائرکون خراب تھا ، لہذا ہم نے ٹورسٹ کا ٹکٹ لیا اور صبح پکنک کھانا بنا کر راوبگی کی جگہ اگئے جو شپ یارڈ کے ، شمال مغربی کنارے پر تھی ۔ گیغ بند تھے لہذا ساتھ پارک میں ، سمندر کے ساتھ بنی منڈیر پر انتظار کے لئے بیٹھ گئے سامان کار ہی میں رہا ۔
  بڑھیا نے کیتھولک عیسائیوں کی سرزمین پر 40 نمازوں کا قصد کیا تھا چنانچہ اُس نے کعبہ نما سے کعبہ کی سمت نکالی جانماز بچھائی اور بیٹھ گئی ، 

چم چم منڈیر پر بیٹھ کر بوٹ کا انتظار کرنے لگی ، 

مجھے دور ، گرجا نظر آیا تو میں نے فوٹو گرافی کے لئے اپنا نائکن 3100 ڈی ایس ایل آر نکالا، اور فوٹو گرافی شروع کی ،
یہاں جتنے بھی گرجے اور مندر ہیں ، انڈونیشیاء نے بنوائے تھے ، 1975 سے پہلے یہاں پرتگالیوں کا راج تھا ، دسمبر میں انڈونیشی فوج کے ایکشن کے بعد ، یہاں کے عیسائی عوام نے مزاحمتی تحریک شروع کر دی ۔ 1999 میں آزادی کے بعد تِموریوں نے جابجا ، جنگ لڑنے والوں کے مجسمے بنائے ، عجائب گھروں میں پوری تحریک کی تصویریں اور دیگر معلومات رکھیں ۔

 یہاں کے درخت بہت قدیم ہیں ، جو بہت خوبصورت دکھائی دیتے ہیں ، درختوں کے پیچھے مجھے ایک مجسمہ نظر آیا وہاں سے گرجے اور مجسمے کی تصویر لی ، پھر مجسمے کے نزدیک گیا ، یہ تمور کی آزادی دو ہیروؤں کا مجسمہ ہے ، جس میں مرتے ہوئے شخص کو دوسرا سہارا دیئے ہوئے ہے ، دونوں مجسمے فن کا اعلیٰ نمونہ ہیں ۔
میں دو تین تصوریں کھنیچ کر واپس جانے کے لئے مڑا تو ایک تِمُوری نوجوان کان میں ہینڈ فری لگا کر سامنے سے آتا ہوا نظر آیا ، اُس نے میری طرف دیکھا ، اور زور سے کہا ،
" السلام و علیکم "
مجھے ایسا لگا کہ ویرانے میں چپکے سے بہار آگئی ہے ۔
" وعلیکم السلام ، ور حمۃ اللہ و برکاتۃ " کہا ، وہ چلتے چلتے رک گیا ، میں نے آگے بڑھ کرگرم جوشی ہاتھ ملایا-
" پاکستان ؟ " اُس نے پوچھا ،
" الحمد للہ " میں نے جواب دیا   ،  نوجوان کا تعلق یہاں کی مسلم آبادی سے تھا میں نے پوچھا ،


" تمھیں کیسے اندازہ ہوا کہ میں مسلمان ہوں ، ہندو بھی ہوسکتا ہوں" 
" پچھلے جمعہ کو میں نے آپ کو مسجدِ نور میں دیکھا تھا " اُس نے جواب دیا ،" لیکن یہ نہیں معلوم تھا کہ آپ انڈین ہو یا پاکستانی "
اُس نوجوان سے کافی باتیں کرنے کا دل چاہا رہا تھا کہ چم چم کی آواز آئی ۔
" آوا ! بوٹ ارہی ہے " چنانچہ اُس کا موبائل نمبر لیا اور آئیندہ ملنے کا کہہ کر ہاتھ ملا کر چل پڑا ۔
بڑھیا نے پوچھا یہ کون تھا جس سے آپ باتیں کر رہے تھے ،
" ایک مسلمان " اور سامان اٹھا کر باقی بچوں کے ساتھ بوٹ کی طرف بڑھ گیا ۔  
بوٹ پر بیٹھے اور  بوٹ ڈیلی سے 41 کلومیٹر دور  سمندر میں   جزیرہ عطارو کی طرف  ہوگئی  ۔

 جو پہلے قیدی رکھنے کو استعمال ہوتا تھا۔ اب مسٹر  ماریہ القطیری،  فریڈم فائیٹر کو بخش دیا گیا ہے - 


 ٭٭٭٭٭

پیر، 27 مارچ، 2017

صدارتی الیکشن - ایسٹ تِمُور 20 مارچ 2017

٭٭٭٭٭٭٭٭
آج ایسٹ تِمُور میں صدارتی انتخابات ہیں ، یہاں 14 سیاسی پارٹیاں ہیں ۔ تمام سکولوں میں چھٹی ہے اور اُن میں پولنگ سٹیشن بنائے گئے ہیں ، یہاں ہر ووٹر صدر کے انتخاب کے لئے ووٹ ڈالتا ہے ۔ جمہوری ملکوں میں جو صدر کا رتبہ ہوتا ہے وہ یہاں بھی ہے ، گویا یہاں کا صدر اور پاکستان کا صدر ، دونوں کی طاقت ایک جیسی ہیں ، یعنی ھیڈ آف دی سٹیٹ اور سٹیٹ فنکشن کی سربراہی پر صدر مطمئن ہوتے ہیں اور طاقت کا سرچشمہ چونکہ عوام ہیں  ۔ لہذا    وہ اپنی طاقت وزیر اعظم کے حوالے کر کے مطمئن ہوجاتے ہیں ۔  موجودہ صدر جوز ماریہ ونکولیس ہے جس کا  سابقہ گوریلا لقب   ۔ ٹیٹم ،  یعنی دو تیز آنکھیں ہے ۔طور متن راک کے نام سے مشہور ہیں ۔
صدارتی انتخابات کا یہاں آج 20 مارچ 2017 کو پہلا راونڈ ہے ، جیتنے والے کو 51 فیصد ووٹ لینا لازمی ہے ، بصورتِ دیگر دوسرا راونڈ 20 اپریل کو ہوگا ۔ 

صدارتی انتخابات کے امیدواراں  کی تعداد  8 ہے  ،
1- جوز انتونیو دی جیسسز دی نیوس  ۔(جوز شمالا 
 روؤا کے نام سے مشہور ہے )  یہ سابقہ گوریلا لیڈر ہیں ۔  2016 تک یہ ڈپٹی کمشنر  اینٹی کرپشن کمیشن میں رہے ہیں ۔ 
2- جوز لوئیس گتیریس  - فرینٹی مڈانکا  ،ایک سیاسی پارٹی ہے  - جس کا مقصد ایسٹ تِمُور  کا احیائے نو ہے ۔
3- اموریم ویرا ، آزاد امید وار ۔
4- لوئیس   اے تلمان   ، آزاد امید وار ۔
5- فرانکوس گتیریس ۔  سابقہ گوریلا جنگجو  ہے –سابقہ صدارتی امیدوار تھا ، لیکن سیکنڈ راونڈ  میں ھار  گیا ۔ انقلابی فرنٹ پارٹی،  ایسٹ تِمُور  سے تعلق ہے ۔ 
6- انتونیو دی کنسیکاؤ ۔ کا تعلق  جمہوری پارٹی سے ہے۔
8-   انجیلا فریتاس   ۔ لیبر پارٹی کی واحد خاتون امیدوار ہے ۔ 
ایسٹ تِمُور سٹیٹ کا دار الخلافہ دیلی ہے اور 11,67,233 افراد پر مشتمل سٹیٹ،   کل 13 انتظامی میونسپل کمیٹیوں میں منقسم ہے ۔  انہیں ڈسٹرکٹ کہا جاتا ہے ۔  یہ ڈٖسٹرکٹ مزید سب ڈسٹرکٹ میں منقسم ہیں ۔ 

مختلف میونسپلٹیز، وہاں  کا رقبہ، آبادی  اور گھروں کی تعداد  کے بارے میں شماریات درج ذیل ہیں ۔
ایسٹ تِمُور سٹیٹ کا سرکاری مذہب  ، کیتھولک ہے اور چرچ کو یہاں فوقیت حاصل ہے ،پاپائے روم یہاں کا روحانی پیشوا ہے ۔  یہی وجہ ہے کہ  1975 میں جب ایسٹ تِمُور  کو پرتگیزیوں  سے آزادی ملی  اور انڈونیشیاء نے 7 دسمبر کو فوجی ایکشن کیا تو یہاں کے لوگوں نے اپنی آزادی کے لئے ہتھیار اٹھا لئے ۔
1999 میں پولنگ کے بعد عیسائی  لیڈر کی فتح  ایک خونیں انقلاب لائی  جس میں شکست خوردہ اسلامو فاشسٹ  مسلمانوں کے ہاتھوں  1400 افراد ہلاک ہوئے  تو یو این کے امن دستوں نے یہاں کا چارج سنبھال لیا ۔ جس میں پاکستانی دستے بھی شامل تھے ، پاکستانی بٹالین کی کمانڈ
ہمارے کورس میٹ  ،کرنل مسعود احمد خان (اب بریگیڈئر ریٹائرڈ ) کر رہے تھے ، جنہوں نے یہاں اچھے اخلاق اور برتاؤ کا مظاہرہ کیا ، یہی وجہ ہے کہ  تِمُور پاکستان فوج کی بہت عزت کر تے ہیں-
اقوامِ متحدہ کے آنے سے جنگ بندی ہوئی اور اس ادارے کی کوششوں سے امن و امان رہا ہے ـ جس کا سہرا ہمارے کورس میٹ  ،کرنل  ، اب  بریگیڈئر (ر)مسعود خان کے سر بھی جاتا ہے ۔ جو یواین کے ساتھ پیس کیپنگ فورس کے کمانڈر رہے تھے -

https://www.facebook.com/photo.php?fbid=103438936861257&set=pb.100015854523281.-2207520000..&type=3&theater 
 بوڑھا بھی اپنا کیمرہ اُٹھا کر نذدیکی پولنگ سٹیشن پر گیا تاکہ وہاں کے حالات دیکھے ، یہ اور بات کہ یو این نے ہمارے  کیبن کیری بگ تیار کروا دیئے ہیں کہ اگر یہاں حالات خراب ہوئے ت تو فوراً یو این کے جہاز پر  آسٹریلیاء کے شہر ڈارون نکلنا ہوگا -

بھلا ہو گوگل میپ کا بوڑھے نے ڈارون شہر کی ایک ایک گلی دیکھ ڈالی -
 تو ذکر ہو رہا تھا پولنگ سٹیشن کا ،

یہاں ڈیلی میں  پاکستان سے آئے ہوئے  ، نوجوانوں نے  اپنی ایک یونئین بنائی ہے ، جس کے موجودہ صدر  کامران سعید ہیں جو ابھی رجسٹریشن کے مراحل میں ہے ۔
یہاں  کی ایک مسجد میں ہر جمعرات کو شبِ جمعہ میں مغرب سے عشاء تک تبلیغ کی جاتی ہے جس  ایک نوجوان عزیز الحق  خطاب کرتے ہیں جن کا تعلق کراچی کی تبلیغی جماعت سے ہے ۔ 

٭٭٭٭٭٭
 ٭-   ایسٹ تِمور-عطارو جزیرے کی سیر

 ٭٭٭٭٭٭٭٭٭٭٭٭
 چم چم ، میں  اور بڑھیا جس دن سے یہاں پہنچے ہیں ، یہاں موجود پاکستانیوں کی محبت اور دعوتوں کا لطف اُٹھا رہے ہیں، جو یہاں ایک فیملی کی طرح رہتے ہیں ، اجنبیوں کے درمیان مانوس زبان کی آواز سننے کو کان کتنا ترستے ہیں ، اِس کا اندازہ دیارِ غیر میں موجود افراد ہی کر سکتے ہیں ۔ ٭


ایسٹ تَمور - چم چم کی سالگرہ

٭٭٭٭٭٭٭
چم چم کی تاریخ پیدائش 14 مارچ ہے ، لیکن اُس کی دستیابی کی صورت میں ، سالگرہ 10 مارچ سے ہی شروع ہوجاتی ہے، ویسے میں گھر میں جب بھی کیک آتا ، اُسے چم چم اپنی سالگرہ کا کیک سمجھ کر کاٹتی ، نانا نانی ، ماما بابا ، خالی ، پھوپی ، چچاؤں ، دونوں ماموں کے کیک کی تو کوئی بات نہیں لیکن جب اُس نے لڈؤ اور برفی کے کیک پر حق جمانا شروع کیا تو اُسے بتایا کہ ، سالگرہ سال میں صرف ایک ہوتی ہے ۔ لیکن اب بھی ، کوئی پانچ چھ کیک تو اُس کی سالگرہ کے ہوتے ہیں، جو مختلف دنوں میں سالگرہ مِس کرنے والے کاٹتے ہیں اب آخری کیک ، اسلام آباد میں دادا کے گھر کاٹا جائے گا ،
گو کہ 14 مارچ کو یہاں پہنچتے ہی اُس کی ماما نے سالگرہ کا انتظام کیا تھا ، جس میں تین فیلیز شامل تھیں،  پھر اعلان کیا کہ  18 مارچ کو بروز ہفتہ سالگرہ ہوگی اور تمام پاکستانی مدعو ہیں ، اُس کے لئے وٹس ایپ بر دعوت دے ڈالی ، مگر 20 مارچ کو الیکشن کی غیر یقینی صورت حال کی وجہ سے یہ آج 26 مارچ کو ملتوی کرنا پڑی ۔

چم چم کی ماما کا خیال تھا کہ کرسٹو رے ، کے دامن میں بیچ کا علاقہ اِس کے لئے نہایت موزوں ہے ، سب نے کہا کہ ، ریسٹورانٹ سے نہیں بلکہ گھریلو چیزیں بنوائی جائیں گی ۔ 
صبح دس بھے میزبانوں کا قافلہ روانہ ہوا ، یہ دیکھ کر حیرت ہوئی کہ 3 کلومیٹر بیچ کھچا کھچ بھری ہوئی تھی، 

سب سے آخر میں جہاں ہم نے جگہ منتخب کی تھی ، جہاں ابھی تک کافی جگہ خالی تھی ، چٹائیاں اور چادریں بچا کر ، جگہ پر قبضہ کیا ، دوسرا مرحلہ ہیپی برتھ ڈے کے غبارے اور جھنڈیاں ٹانکنے کا تھا ۔ جھنڈیاں ٹانکتے وقت ، غبارے پھلانے کی ذمہ داری تین نوجوانوں کو دی ۔ 
چم چم نے سمندر دیکھا تو مچل گئی ، وہ پانی کی طرف دوڑی تو اُس کی ماما نے چلا کر واپس بلایا تو اُس نے کہا ،
" ماما بیچ پر پارٹی کیوں رکھی ؟"
بات تو اُس کی درست تھی ۔ لیکن سب تو کیک کاٹنے کے بعد ہونا تھا ،
آہستہ آہستہ مہمان آنا شروع ہو گئے ، وعدہ تو قریباً 37 افراد اور 20 بچوں کے آنے کا تھا ، جن میں پاکستانی اور یواین کی 5 فیملیز بھی تھیں جن میں سے تین فیملیز آئیں ، جن کی 5 بچیاں چم چم کی ہم عمر تو نہیں لیکن کھیل میں ماہر تھیں ، اُنہیں بھی پانی میں جانے سے روکا ،
11 بجے ، جب آخری پاکستانی فیملی آئی تو کیک کاٹا گیا ،
چم چم اور بچیاں تو کیک کاٹتے ہی پانی کی طرف دوڑیں ،


بوڑھے نے بڑھیا سے گلہ کیا ،
" خواہ مخواہ ، مجھے پینٹ اور قمیض پہنا دی "
" آرام سے بیٹیں اور مہمانوں کو دیکھیں " اب بوڑھا چم چم تو نہیں ، کہ بات منوا کر چھوڑے۔
کھانے کے بعد سب کو بیٹی اور بڑھیا نے اکٹھا کیا اور غبارے پُھلانے کا مقابلہ شروع کروا دیا ،مقامی لوگ دیوار پر آکر بیٹھ گئے ، غیر ملکی دور سے خوش ہو رہے تھے ۔
اُس کے بعد ، " جیوے جیوے پاکستان " سب نے مل کر گایا ،


سوہنی دھرتی اللہ رکھے ، سے لوگوں کے دل میں جذبہءِ پاکستان گرمایا ۔

پاکستان کا قومی ترانہ مل کر پڑھا ۔

پھر بیت بازی کا مقابلہ شروع ہوا ، جب شعر ختم ہوتے ہیں تو پھر صحیح مقابلہ شروع ہوتا ہے ، شعر و شاعری کا یہ مقابلہ ، محمد ارشاد نے بلا مبالغہ اپنی دو نظمیں سنا کر جیت لیا جو اُس نے میٹرک میں کہیں تھیں۔

یوں ایسٹ تِمُور میں بزمِ ادب کی بنیاد پڑھ گئی ۔ 

اتوار، 26 مارچ، 2017

مشرقِ بعید-ٹِمور لِسٹے (ایسٹ تِمور)

 ٭٭٭٭٭٭٭٭٭٭٭٭
 چم چم ، بڑھیا اور بوڑھا ،سِلک ائر میں سمندروں اور جزیروں کے اوپر ہے پرواز کرتے ہوئے ، ایسٹ تِمور  کے کیپیٹل ڈِیلی  کی فضاء میں اترنے کے لئے سمندر کے اوپر چکر کاٹ رہے تھے ،" وہ دیکھو  ائرپورٹ "بوڑھے نے ایک پتلی سے لینڈنگ سٹرپ کی طرف اشارہ کرتے ہوئے کہا ۔" اتنی چھوٹی ، اور آگے سمندر کیا پائلٹ اِسے آرام سے اتار لے گا ؟" بڑھیا نے جملہءِ شکیّہ میں پوچھا ۔
" نانو، میں نے پڑھا تھا کہ ایک دفعہ جہاز پانی میں اُتر گیا ، تو لوگوں کو بوٹس سے نکالا تھا " چم چم بولی ۔
" عالی چُپ کرو ، بُری باتیں نہیں کرتے " بڑھیا بولی
" سچ نانو !  لوگوں کو اتنا مزہ آیا وڈیو میں کئی لوگ سمندر میں سوئمنگ کر رہے تھے "چم چم خوشی سے بولی ۔" آوا ، آپ اور میں دونوں سوئمنگ کریں گے اور نانو بوٹ میں جائیں گی" ۔ 
بڑھیا نے تسبیح گھمانی شروع کردی اور پائلٹ  نے جہاز  گھمایا اور  رن وے پر آرام سے اتار لیا ۔ 


مشرقی تِمُور انڈونیشیا کے ساتھ چھوٹا سا ملک ہے جس کا دارلحکومت ڈیلی ہے۔
1975؁ میں سلطنتِ پرتگال نے تِمور  کو آزاد کِیا تو انڈونیشیا نے فورا جزیرہءِ تِمُور پر قبضہ کر لیا اور آزادی پسند فرقوں کو جبراً اپنے ماتحت کرنے کی کوشش کی ـ مغربی طاقتوں نے انڈونیشیا کی حمایت کی اس ڈر سے کہ مشرقی تِمُور چین کی مدد حاصل کرتے ہوئے کامیونسٹ بن جائے گاـ
1999 میں انڈونیشیا ریفرینڈم پر رضامند ہو گیا جس ٘میں مشرقی تِمُور کے باشندے مقامی خود ٘مختاری اور آزادی کے درمیان فیصلہ کریں گےـ جب نتیجہ آزادی کے حق میں آیا تو وہ تِمُوری جو انڈونیشیا کے حق میں تھے سڑکوں میں تشدد اور قتلِ عام کرنے لگے ـ سینکڑوں ہلاک ہوئےـ



چم چم کی ماما نے ایسٹ تیمور میں 14 مارچ کو آتے ہی چم چم کی سالگرہ منائی ، اور چم چم کو دو پہیوں والی سائیکل کا تحفہ دیا ، چم چم کو ملنے والی یہ تیسری سائیکل ہے جو اِسے برتھ ڈے پر ملی ، ایک سائیکل دادو کے گھر پر ہے ، دوسری نانو کے گھر پر اور تیسری یہاں ماما کے گھر پر ۔
لیکن چم چم کو تین پہیوں والی سائیکل کا مزہ زیادہ آتا ۔
اب چم چم کی ماما نے بوڑھے کو ٹاسک دیا کہ اِسے سائیکل سکھانی ہے اور وہ بھی دو پہوں والی ۔
15 تاریخ کو بوڑھے نے ناشتے کے بعد چم چم کو کمپاونڈ کے صحن میں دو چکر تین وہیل کے لگوائے ،
پھر پانے کی مدد سے دونوں پہیوں کو آدھا انچ اوپر کیا ۔
دو گھنٹے بعد پھر کل ایک انچ اوپر کیا اور چم  چم سائیکل چلاتی رہی ۔
اگلے دن یعنی 16 مارچ کو جب چم چم ڈگمگاتی سائیکل چلانے کی ماہر ہو گئی ، تو بوڑھے نے اُس کی اجازت سے ، اِس شرط پر دونوں چھوٹے وہیل ہٹا دئیے کہ وہ جب سائیکل چلائے گی تو اُسے پکڑے رہے گا اور ساتھ ساتھ دوڑے گا ،
بوڑھا ، سمجھ گیا کہ اب چم چم دو ہیل پر سائیکل چلانے کے لئے مکمل تیار ہے ۔
چنانچہ دوستو !
بوڑھے نے دونوں پہیئے اتارے ، چم چم کو گھر سے گیٹ تک پکڑ کر سائیکل چلوائی اور گیٹ سے  جونہی چم چم نے سائیکل کو پیڈل مارا ، بوڑھے نے ، چم چم کو چھوڑ دیا ۔
چم چم شور مچاتی پیڈل مارتی گھر کے دروازے تک پہنچی ۔ بڑھیا گھبرا کر باہر نکلی ۔ اور وہ خوشی کا لمحہ تھا جب چم چم کی خوف اور مسرت کی ملی جلی چینخیں ، بوڑھے کا ساتھ دوڑنا ، گیٹ پر کھڑے تمُری چوکیداروں کا تالیاں بجانا اور کام کرنے والیوں کا ہنسنا ۔
بوڑھے ، کی سوچ 1988 اپریل میں چھلانگ مار گئیں ، جب چم چم کی ماما نے 7 سال اور 5 ماہ کی عمر میں لاہور میں اِسی طرح سائیکل چلائی تھے ۔
جب بوڑھے باپ ، ارے نہیں جوان باپ نے ،گھر کے سامنے کے میدان میں اُسے سائیکل پر بٹھا کر پیڈل مارنے کے بعد چھوڑ دیا ، پہلے تو وہ خوف سے چینخی ،
" پپا ، گر جاؤں گی "
" پس پیڈل مارتی رہو ۔ نہیں گرو گی " بوڑھا بولا
وہ خوف اور مسرت میں بھرپور شور مچاتی ، دو چکر لگانے کے بعد گھاس پر گر گئی ، اور وہاں سے دوڑتی گھر میں گئی اور ماما کو کھینچتی لائی ، اور ماما کو اپنی مہارت دکھائی ۔
چم چم نے دس بجے تک مہارت حاصل کر لی اور بار بار پوچھے ماما کتنے بجے آئیں گی ،
خیر بڑھیا نے ، اُسے کھانا کھا کر سلا دیا ، ساڑھے چار بجے اُٹھی اور ماما کا انتظار کرنے لگی ۔
جونہی 5:10 پر ماما آئی ، تو ماما کو سائیکل چلا کر حیران کر دیا ۔



بیٹی کے ہاتھ کے پکے ہوئے تموری چاول ۔

 
جہاں بیٹی نے رہائش رکھی وہاں  کے  چینی اونر مسٹر کانگ کی بیٹی میلانی کی دوستی چم چ سے ہوگئی - وہ سکول سے آتے ہی عالی عالی کی آوازیں دیتی ہمارے ہاں آدھمکتی وہ اُس کا  بھائی اور چم چم تینوں سائیکل چلاتے ۔


تِمُور لسٹے (ایسٹ ) میں نیٹ ورک کی رفتار اتنی آہستہ ہے ، کہ ایک پکچر اپ لوڈ کریں اور پاس کے کمانک (جنرل سٹور) سے جاکر ڈبل روٹی اور انڈے لے آئیں ، تو تصویر اَپ لوڈ ہونے کے آخری مراحل میں ہوتی ہے ۔

 ٭٭٭٭٭٭٭٭٭٭٭

ہفتہ، 25 مارچ، 2017

مشرقِ بعید - سنگا پور تا ٹِمور لِسٹے (ایسٹ تِمور)


مشرقِ بعید-کولمبو تا سنگا پور اور چانگی ائر پورٹ

٭٭٭٭٭٭٭٭٭


صبح  چھ بجے آنکھ کھل گئی ۔  8 بج کر 25 منٹ پر  چیک اِن ہونا تھا ، تیار ہو کر بوڑھے نے چائے بنائی ، بڑھیا نے بسکٹ نکالے ،  چم چم کو جگایا ۔ اُس  نے  پھر کپ کیک کھانے کی فرمائش کی ۔ چنانچہ  پونے سات بجے ہوٹل سے چیک آؤٹ کیا ۔
  اور پھر میکڈونلڈ والے فلور پر پہنچے ، چم چم نے اپنے لئے ، ہیپی میل پسند کیا ، وہ لے کر انڈین ریسٹورینٹ پہنچے  ، بوڑھے نے لچھے دار دو عدد پراٹھوں کا آرڈر دیا ، ساتھ دال ملی ۔ مزے سے کھایا ، چائے پی اور بورڈنگ پاس لینے کے لئے  کاونٹر پر پہنچے ۔  جو ہمارے ہوٹل کے نیچے اور ڈرائینگ بنانے کے سامنے تھا ۔
چم چم  ،بوڑھا اور بڑھیا کاونٹر کے سامنے جاکر کھڑے ہوگئے ۔ کاونٹر اونچا تھا ، چم چم کو  ٹکٹ دینے والی    ملائی لڑکی نظر نہیں آرہی تھی بوڑھے نے چم چم کو اوپر اُٹھایا -
 چم چم نے کہا ، "ہم نے  ایسٹ تیمور جانا ہے ، مجھے ونڈو  سیٹ چاھئیے "  
" اوہ ینگ گرل مجھے دیکھنے دو  کہ   سیٹ بُک تو نہیں ہوئی " ملائی لڑکی مسکراتی ہوئی بولی ۔ 
" اوہ  ، میں نے تمھیں ونڈو سیٹ دے دی اب خوش ہو "
" شکریہ میڈم " چم چم نے کہا اور میری گود سے نیچے اُتر گئی ۔
بڑھیا اور چم چم  پیچھے رکھے ہوئے صوفوں پر جا بیٹھیں ، " ملائی لڑکی نے بورڈنگ کارڈ اور ٹکٹ ہمیں واپس کئے ۔
اب ہم دوگھنٹے تک گھومنے پھرنے کے لئے آزاد تھے ۔ لیکن ہمیں گیٹ نمبر 52 کے اردگرد رہنا تھا ۔
لیکن چم چم کا جھولا جھولنے کا پروگرام تھا۔چم چم ٹرالی پر بیٹھ گئے اور ہم جھولوں کی طرف چل پڑے ۔

 
چم چم  نے ہر جھولا جھولا ، رنگوں سے سکیچ بنائے  ، اپنے دکھتے پیروں کا مساج کیا ،  گھنٹے بعد  ہم گیٹ نمبر 52 کے پاس آئے تو چم چم  نےچلنے والی پٹی پر دوڑنے کی خواہش ظاہر کی ۔   چنانچہ ، گیٹ کے سامنے سامان رکھ کر بڑھیا کو بٹھا دیا ، چم چم  نے  پیدل چلنے والوں کے لئے چلنے والی سٹرپ پر ایک طرف سے جانا اور دوسری طرف سے واپس آنے کا کھیل شروع کر دیا ، جب تھک گئی  تو بڑھیا  کی کرسی کے پیچھے  سٹرپ پر کھڑی ہو گئی اور سٹرپ چلتی رہی اور وہ جاگنگ مل کی طرح ایکسرسائز کرتی رہی ،  کہتے ہیں کہ بچوں میں جن حلول کئے ہوتا ہے ۔ گھنٹہ دھماچوکڑی مچانے کے باودوجود بھی جب جہاز کے لئے لاونج میں آنے کا اعلان ہوا تو وہ ، ایک بار کا کہہ کر پوری 100 میٹر کے لگ بھگ سٹرپ پر جاکر دوسری سٹرپ سے دوڑتے ہوئے واپس آئی ۔

 گیٹ پر سِلک ائرا ور امیگریشن کا عملہ کھڑا تھا ۔لیپ ٹاپ کو اُس کے بیگ سے نکالا ، پرس ، موبائل اور تمام  ، میٹیلک اشیاء بشمول عینک ، لیپ ٹاپ کے بیگ میں ڈالیں ، بڑھیا نے اپنے بیگ میں ، ڈالیں  ۔ جوتے اتار کر  ٹرے میں رکھے ، اور ہینڈ کیری   سامان سمیت  سکیننگ مشین  کے حوالے کر دیا ، اور خود  میٹل ڈیٹیکٹر گیٹ سے گذر کر دوسری طرف آئے ۔  امیگریشن سٹاف کی خاتون نے بڑھیا کے بیگ سے پانی کی بوتل برآمد کی اور بے اعتنائی سے ڈسٹ بن میں ڈال دی جو اُس نے چم چم کے لئے رکھی تھی ۔  مرد نے بوڑھے کو بیگ کھولنے کا کہا ، دو کوک ٹن ، ایک سیون اپ اور ایک سیون اپ ڈائیٹ کا ٹن  بر آمد کئے ۔
" یہ آپ نہیں لے جاسکتے " مرد نے کہا
" یہ ہم پاکستان سے نہیں لائے چانگی سے خریدے ہیں " بوڑھے نے کہا
" لیکن اِس کی جہاز پر اجازت نہیں  ! " وہ بولا
" کیا ہم اِسے پی سکتے ہیں  ؟ " بوڑھے نے پوچھا
لاونج  میں بیٹھ  کر پینے سے بہتر ہے کہ یہاں پی لیا جائے ، بوڑھے نے سوچا ، چنانچہ چم چم کو کوک دی ، بوڑھے نے سیون اَپ لی لیکن بڑھیا نے ڈائیٹ لینے سے انکار کر دی ۔
" نہیں ، نہیں یہ نہیں پھینکیں " بڑھیا کی اونچی آواز سنائی دی " یہ سالگرہ کا تحفہ ہے "
بوڑھے نے کوک پیتے ہوئے دیکھا  ، مرد کے ہاتھ میں وہ پرفیوم تھا جو بڑھیا نے بوڑھے کو اُس کی 63 ویں سالگرہ پر 16 ستمبر کو دیا تھا ،
" پلیز اِسے مت  پھینکنا " بڑھیا گھگیائی "  یہ پر فیوم ہے اِسے سونگھ کر دیکھو "  
مرد نے سونگھ کر دیکھا ، بوتل کو غور سے دیکھا ،
 " لیکن یہ 200 ملی لٹر سے زیادہ ہے "  وہ بولا " میم اِس کو جہاز میں لے جانے کی اجازت نہیں "
جیمز بانڈ اور امریکی فلموں میں  200 ملی لٹر پرفیوم کی مدد سے جہاز اغواء کرنے والے سین نے امیگریشن سٹاف کو زیادہ تعلیم یافتہ بنا دیا ہے ۔
" سر یقیناً جب یہ خریدہ تھا تو 200 ملی لٹر سے زیادہ تھا " بوڑھا بولا " لیکن اب یہ تو صرف  آدھا رہ گیا ہے "
ادھیڑ عمر نصف گنجے سر والے امیگریشن  پہلوان نے بوتل کو غور سے دیکھا ،
" ٹھیک ہے یہ کم ہے اورواپس بوتل کو سوٹ بیگ میں ڈال دیا ۔ اتنے میں بوڑھا اپنی سیون اپ ختم کر چکا تھا ، لیکن چم چم نے ابھی دو تین گھونٹ ہی لئے تھے ، بوڑھے نے  اپنا خالی ٹِن اُس کے حوالے کیا اور چم چم کی کوک کو اُسے دکھاتے ہوئے  کہا ۔
" آفیسر میرا خیال ہے کہ ، اِس کوک کے ٹِن  میں آتش گیر سیال اب  ون ہنڈریڈ  ایٹی سکس لٹر رہ گیا ہے ،  اب 200 سے کم ہے ۔ کیا اِسے لے جاسکتے ہیں ؟"
امیگریشن آفیسر  نے بوڑھے کی طرف دیکھا ، اور قہقہہ لگایا ، 
" بائی آل مین سر  " وہ بولا " لیکن جہاز میں بیٹھنے سے پہلے ، اِسے ڈسٹ بن میں ڈال دینا "
" یقیناً : بوڑھا بولا " شکریہ سر ۔ آپ مہربان ہیں " اور آگے بڑھ گئے ۔اور جاکر کرسیوں پر بیٹھ گئے ۔ 
" لیکن آوا ، آپ نے جھوٹ کیوں بولا " چم چم نے پوچھا
" میں نے !  کب ؟ " بوڑھے نے حیرانگی سے پوچھا ۔
" آپ نے اُس ڈرایا تھا  نا ؟  " چم چم بولی " کہ اِس میں  آتش گیر سیال ہے ، لیکن اِس میں تو کوک ہے "  
" ارے نہیں ، میں نے اُس سے مذاق کیا تھا " بوڑھا بولا
چم چم وسیع و عریض ، کھڑکی کے پاس کھڑی ہوگئی جس سے  دو سوفٹ  دور سِلک ائر کا جہاز کھڑا تھا جس میں ہم نے اپنے سفر کے آخری حصے کے لئے سوار ہونا تھا ۔ رن وے پر ایک کے بعد ایک جہاز اُڑ رہا تھا اور دور والے رن وے پر اتر رہا تھا ۔ چم چم اپنی سکریپ بُک میں جہازوں کے نام لکھ رہی تھی ۔ پندرہ منٹ بعد واپس آئی ، جو کوک اُس نے چھوڑی تھی وہ پی  کر ،  نانو کی گود میں سر رکھ کر بیٹھ گئی ۔
جہاز میں بیٹھنے کا اعلان ہوا ، بوڑھے نے اپنے ہاتھ میں پکڑی ہوئی کوک اُس کو دی ۔
" چم چم ، یہ ختم کر کے ٹِن ڈسٹ بِن میں ڈال دو " بوڑھے نے کہا ۔
" نہیں آوا  " چم چم بولی ، چنانچہ بوڑھے نے وہ کوک ختم کی اورٹِن  چم چم کو دیا اُس نے  وہ  ڈسٹ بِن میں ڈال دیا ، چم چم نے ہاتھ میں پاسپورٹ اور بورڈنگ کارڈ لئے ، بوڑھے نے  ، چم چم کا بیگ ، اپنالیپ ٹاپ ، کیمرہ اور ہم تینوں کے سفری سامان کا سوٹ بیگ لیا اور کھڑے ہوئے ۔ گیٹ پر کھڑے ہوئے ۔ سٹاف نے ہماری طرف آگے بڑھنے کا اشارہ کیا ۔ میں نے دائیں بائیں دیکھا  پورے جہاز کے مسافروں میں ، وہ اشارہ ہم تینوں کے لئے  کیا تھا ،  خوشی ہوئی کہ ہمیں یعنی اکانومی کلاس کے مسافروں کو  وی وی آئی پی کا پروٹوکول دیا جارہا ہے ، یوں  سَلک ائر وے کی جہاز میں داخل ہونے والے ہم پہلے مسافر تھے ۔ بڑھیا بھی حیران   بولی ۔
 " اِنہوں نے ہمیں سب سے پہلے  کیوں سوار  کیا  ؟ "
" عالی کی وجہ سے " بوڑھے نے جواب دیا ، " کیوں کہ تمام مسافروں میں   صرف  عالی ہی، وی وی آئی پی مسافر ہے "  
" حیرت ہے کہ یہ بچوں کو اتنی فوقیت دیتے ہیں ! " بڑھیا حیرانی سے بولی  " ہمارے ہاں تو ایسا نہیں ہوتا "
" ہم انسان نہیں" ،بوڑھا بولا ،  "پاکستانی ہیں "
چم چم  ، کھڑکی کے نزدیک بیٹھ گئی ، پھر بڑھیا اور آخر میں بوڑھا  ۔ چم چم نے اپنا آئی پیڈ نکالا اور گیم کھیلنے لگی  ۔  سب مسافروں کے بیٹھنے کے بعد ائر ہوسٹس  چم چم کے پاس آئی  اور پوچھا، "ینگ گرل،  آپ کیا پیئں گی "؟
" ایپل جوس   اور چاکلیٹ بسکٹ " چم چم بولی ۔
ائر ہوسٹس   نے چم چم کو   ایپل جوس   اور چاکلیٹ بسکٹ لا کر دئیے ۔ دوسری  ائر ہوسٹس  سب کو ایک چھوٹا سا پیکٹ لا کر دے رہی تھی ۔ ہمیں بھی تین پیکٹ دئے ، بڑھیا نے ایک کھولا اُس میں   خوشبو ملے پانی میں تر  ٹشو رومال تھا  ۔ بڑھیا نے سونگھا ،  بوڑھے کو دیا  کہ آپ نے ہاتھ صاف کرنے ہیں ، بوڑھے نے انکار کیا تو باقی دو رومال بڑھیا کی زنبیل میں چلے گئے ۔
ابھی  اسلام آباد میں  یہ داستان لکھتے ہوئے بوڑھے نے سامنے صوفے پر لیٹ کر تسبیح  گھماتی ہوئی  بڑھیا سے پوچھا ،
" بیگم ، یہ بتاؤ !  سلک ائر میں ملنے والے  ، وہ  ٹشو رومال کہاں ہیں ؟ "
 " کیوں خیریت  ؟ "  بڑھیا نے آدھا اٹھ کر پوچھا ،" دو مہینے بعد وہ کیوں یاد آئے ؟"
" ویسے ہی پوچھ لیا " بوڑھے نے کہا
" پڑے ہیں میرے پاس " بڑھیا نے واپس لیٹتے ہوئے کہا " سفر کی یادگار  کے طور پر "
بڑھیا کا ایک مکمل بکس  ایسی یاد گاروں سے بھرا ہوا ہے ۔ جس میں اُس کے لئے سب سے اہم ، ایک سال خوردہ کاغذ میں ،ایمفورا تمباکو کے چند خشک پتے ہیں ، جو 1977 سے اُس کے پاس ہیں ۔  
ایک  ائر ہوسٹ نے  ، پانی ، سافٹ ڈرنکس اور ڈرنکس دینا شروع کئے ،  جب سب نے پی لئے تو ، ایک بڑے سے شاپر میں   ہوسٹ اور ہوسٹس نے خالی بوتلیں اور خالی ڈبے  جمع کرنے شروع کئے ، اتنے میں جہاز  نے  سنگا پور کے وقت کے مطابق  9 بج کر 25 منٹ پر چلنا شروع کیا اور پھر اُڑان بھری ، سنگا پور کی بلند دو بالا بلڈنگز کے اوپر سے گذرتا ہوا  ، حدِ نظر  کھڑے ہوئے   سمندر میں کھڑے ہوئے بحری جہازوں سے سلامی لیتا ہوا  بادلوں  میں داخل ہوتے ہوئے   نیلگوں آسمان  میں اُڑنے  لگا  ، بادلوں کے بھی عجیب رنگ تھے ، برف کی طرح سفید سے  قرمزی  اور سیاہ کالے ۔  سفید بادلوں کو دیکھ کر خوشی محسوس ہوتی ہے اور سیاہ بادلوں سے خوف ، کہ اِن کے پیچھے کتنے مہیب طوفان چھپے ہیں !

٭٭٭٭٭٭٭٭٭٭٭٭٭٭٭٭٭٭٭٭٭
 

پیر، 20 مارچ، 2017

مشرقِ بعید-کولمبو تا سنگا پور اور چانگی ائر پورٹ

مشرقِ بعید - لاہور تا کولمبو (سری لنکا)

 ٭٭٭٭٭٭٭٭٭٭٭٭٭٭


 
سری لنکا کے وقت کے مطابق ایک بج کر 55 منٹ ، پاکستان کے وقت کے مطابق ایک بج کر 25 منٹ  اور سنگاپور کے وقت کے مطابق ،  4 بج کر 25 منٹ گویا ، ساڑھے  چھ گھنٹے کے سفر کے بعد ہم  سنگاپور کے ، چانگی ائر پورٹ  کے ٹرمینل 3 پر اترے ۔
بھئی کیا بڑا ائر پورٹ ہے، ایک ٹرمینل سے دوسرے ٹرمینل تک جانے کے لئے ، خود کار  سکائی ٹرین چلتی ہے  ۔ائر پورٹ کے تین ٹرمینل ہیں ۔ ہر دو  منٹ  بعد ایک جہاز اترتا ہے اور دوسرا روانہ ہوتا ہے ، ٹیکسی وے پر انتظار میں جہاز یوں انتظار کرتے نظر آرہے تھے کہ جیسے آگے روٹ لگا ہوا ہے ۔ دنیا کی ہر ائر لائین ، یہاں سے گذرتی ہے ۔
ہم ٹرمینل 3 سے ٹرمینل 2 پر پہنچے جہاں اگلے دن  سلک ائر کی فلائیٹ  ایم آئی 296 ،  سنگا پور کے وقت کے مطابق 9 بج کر 25 منٹ پر تھی ۔ہم پاکستان سے تین گھنٹے آگے تھے ۔

 ٹرمینل 2 پر میجسٹک ہوٹل میں 3 بیڈ کا کمرہ بُک کروایا ہوا تھا ؛ جو    6 گھنٹے کے لئے تھا ، یعنی شام 7بجے سے رات ایک بجے تک ، چنانچہ  مزید 6 گھنٹے کے پیسے ادا کر کے صبح  7 بج تک   وقت بڑھا لیا ، چابی لے کر کمرے میں پہنچے ،  بوڑھے نے  غسل کیا ، چائے بنائی اور پھر تینوں آٹھ بجے   ٹرمینل 2 کی سیر کو نکلے ۔
  چم چم کی ماما نے چم چم کو بتایا کہ اُس کے لئے ائر پورٹ پر کیا کیا تفریح ہیں۔ پیسٹل کلر پینٹنگ ، سن فلاور گارڈن، جھولے ، پاؤں  دبانے کی مشینیں ، بٹر فلائی گارڈن ، میکڈونلڈ ، سب وے ، انڈین فوڈ ۔ ائر پورٹ پر ہر تین گھنٹے کے لئے انٹرنیٹ کنیکشن فری جو پاسپورٹ دکھانے پر ملتا ۔  
 چم چم  کی ساری کارگذاریاں ، بڑھیا ، فیملی گروپ پر  وٹس ایپ کر رہی تھی  ۔ دس بجے کھانے کا پروگرام بنا  ، لفٹ سے تیسری منزل پر پہنچے ، چم چم کو سب وے نظر آیا ، اُس نے سب وے پر کھانے کا شور مچا دیا ، سب وے کے پاس پہنچے  ، بوڑھے اور بڑھیا کو متلی سی ہونے لگی ۔
بوڑھے نے   پوچھا ،"حلال فوڈ؟"
چھوٹی سی گول مٹول سنگا پوری لڑکی بولی ، " نہیں "
واپس لوٹے توچم چم مچل گئی ، کہ کھائے گی تو سب وے ہی کھائے گی ، نانو ، آوا اچھے نہیں ہیں ، سب کھانے کھانے کے لئے ہوتے ہیں ، بابا نے بتایا کہ انہوں نے سنگا پور میں سب کھانے کھائے تھے ۔
بوڑھے کا دماغ  گھوم گیا ، " کیا ، آپ کے بابا نے یہ کہا تھا کہ اُس نے سب کھانے کھائے تھے؟ "
" جی یہی کہا تھا " چم چم بولی ۔
" کیا یہ بھی کہا تھا ، کہ انڈین فوڈ بھی کھایا تھا ؟" بوڑھے نے پوچھا ۔
" ہاں ، بابا نے سب کھانے کھائے تھے " چم چم تقریباً روتے ہوئے بولی ۔" نانو میں بھی کھاؤں گی "
" اچھا ایسا کرتے ہیں کہ ابھی انڈین فوڈ کھاتے ہیں ، میں بابا سے پوچھوں گا ، پھر جو کھانے بابا نے کھائے وہ کھلا دوں گا " بوڑھے نے چم چم کو سمجھایا ۔
" پرامِس " وہ بولی
" پرامس، اگر آپ کے بابا نے مگر مچھ ، چھپکلی ، سانپ ، کچھوے ، کیکڑے  اور  آکٹوپس کھائے ، تو وہ بھی کھانے پڑیں گے " بوڑھا بولا
" نو وے !! آوا ، آپ مجھے کچھ بھی کھانے پر مجبور نہیں کر سکتے " چم چم بولی "  میری مرضی جو میں کھاؤں "
" میں میکڈونلڈ ، کھاؤں گی" چم چم میکڈونلڈ کا بورڈ دیکھ کر بولی ۔
بڑھیا نے ، میکڈونلڈ پر کھڑی لڑکی سے پوچھا  " آپ کے پاس حلال فوڈ ہے ؟"
" جی ہاں ہمارے پاس صرف چکن اور بیف ہے " وہ بولی " اور وہ دیکھیں حلال فوڈ کا لوگو "

بوڑھے نے آگے بڑھ کر لوگو کو غور سے دیکھا ، اور چم چم کو کہا ،" اپنی پسند کا آرڈر دے دو  اور ہاں سب تمھیں کھانا ہے کوئی بھی چیز نا بچے  ، میں نہیں کھاؤں گا ۔ نانو بے شک کھا لے "
نانو نے بھی انکار کر دیا ، چنانچہ چم چم نے  برگر اور نّگٹ  لئے چپس اور کو ک ساتھ ملی ۔ نانو نے اُسے کھانا کھلایا ۔ 

 

پھر ہم تینوں انڈین ریسٹورینٹ گئے ، پہلی خوشی تو یہ ملی ، کہ انگلش سے پیچھا چھوٹا   ، کاونٹر پر موجود ہندی نوجوان  ، ہندی بول رہا تھا جو ہمیں اردو لگ رہی تھی ، ویسے  بھی پانچ ہزار سالوں سے بولی جانے والی ہندی کی اردو ، نومولود سگی بہن تھی ، لیکن پھر 1857 کے بعد ھندی نے ، فارسی اور عربی سے رشتہ داری گانٹھ لی ۔
اُس نے جن کھانوں کے نام بتائے وہ سب قابوں میں پڑے  شوکیس میں گرم ہورہے تھے ، بوڑھے نے اپنی مسلمانی بچانے کے لئے ، دال چاول کا آرڈر دیا ۔ بڑھیا نے بھی  دال چاول پر اکتفا کرنے کا ارادہ کیا ، بوڑھے نے ماش کی دال اور بڑھیا نے لوبیئے کی دال منگوائی ۔ جس میں ذائقہ کم اور پیٹ بھرنے کا سامان تھا ۔ ہاں ساتھ انہوں نے جھونگے میں ایک ایک رکابی میں دال دی  ، جو ارہر کی دال کے مشابہ تھی مگر اُس کی سیرت نہ بڑھیا پہچان پائی اور نہ بوڑھا ، لیکن وہ مزیدار تھی ، ایک تقریبا 80 سالہ دھان پان سے بڑھیا ، ٹیبل صاف کرنے پر لگی تھی بوڑھے نے اشارہ کر کے پوچھا  ،" کیا یہ اور مل سکتی ہے "
 وہ ایک ٹرے میں دو  رکابیاں لے آئی ، لوبیا اور ماش ایک طرف ، دونوں نے چاول اُس دال سے تر کیے  اور پیٹ بھر کر کھایا ۔ بوڑھے نے کھانے کے بچے ہوئے پیسوں میں سے ، ایک سنگا پوری ڈالر کی اُسے ٹپ دی تو وہ خوش ہو گئی ۔
بوڑھے اور بڑھیا پر آہستہ آہستہ تھکن غالب آرہی تھی ،  رات 12 بجے چم چم نے آٹھ سال کا ہوجانا تھا ،  گو کہ چم چم  کے ساتویں سال کا آخری دن تین گھنٹے پہلے ہی ختم ہوچکا تھا ، مگر ٹریڈیشنل  طور پر رات 12 بجے کا بہرحال انتظار کرنا تھا ۔  چنانچہ چم چم نے اپنے لئے گفٹ ایک  ڈاگی پسند کیا  ،   ایک  حلال کپ کیک خریدا ،کیوں کہ سارے بڑے کیک مشکوک تھے ،  رات  ساڑھے گیارہ  بجے ، جب پاکستان میں ساڑھے  آٹھ بج رہے تھے واپس ہوٹل میں آئے  ، بوڑھے نے دوبارہ چائے بنائی ، رات 12 بجے چم چم  نے کپ کیک کاٹا۔
اُسے سالگرہ کی مبارکباد دی، چم چم نے کیک کھایا  اور دونوں نے مل کر چائے پی ، چم چم تو لیٹتے ہی ، خواب میں ماما کے پاس پہنچ گئی ۔


 بوڑھا ، مُفتے کے انٹر نیٹ پر اپنے لیپ ٹاپ سے فیس بُک کے دوستوں میں مگن ہوگیا۔
 ٭٭٭٭٭٭٭٭٭٭٭٭٭٭٭٭٭٭٭٭٭٭
 مشرقِ بعید - سنگا پور تا ٹِمور لِسٹے (ایسٹ تِمور)

خیال رہے کہ "اُفق کے پار" یا میرے دیگر بلاگ کے،جملہ حقوق محفوظ نہیں ۔ !

افق کے پار
دیکھنے والوں کو اگر میرا یہ مضمون پسند آئے تو دوستوں کو بھی بتائیے ۔ آپ اِسے کہیں بھی کاپی اور پیسٹ کر سکتے ہیں ۔ ۔ اگر آپ کو شوق ہے کہ زیادہ لوگ آپ کو پڑھیں تو اپنا بلاگ بنائیں ۔