بابے کو کیا ہوا

فیس بُک کے جوان دوست ،
پریشان ہوں گے ،

کہ بابے کو کیا ہوا ،

رمضان کا مہینہ ،

پہلا عشرہ اور

گانوں پہ گانے پوسٹ کر رہا ہے

'

آہ بابا بھی کبھی نوجوان تھا ،

ایک بابے نے پہلا گانا پوسٹ کیا۔

وہ سننا تھا ،

کہ دھڑ دھڑ کرکے سالوں سے بند کھڑکیاں کھلتی گئیں ۔

بابا ، گانے پہ گانا سنتا رہا ۔

'

بیوی آئی ۔

اس نے چھوٹی سکرین پہ شبنم کو دیکھا

اچھا اب سمجھ آئی کہ راتوں کو جاگ کر کیا کرتے ہیں ۔

ارے میں بھی تو کہوں ، کان پر یہ ٹونٹی لگا کر ،

کیسے انہماک سے اللہ اور رسول کا کام ہو رہا ہے ۔

یہ تو آج معلوم ہوا۔

'

آہ یہ بڑھاپا بھی کیا چیز ہے ۔

ذرا سی جوانی کو آواز دی ،

تو آواز کی راہ میں پہلی رکاوٹ ،

تسبیح گھماتی بیوی ہی آئی ۔

'

اب بابا کیا کرے ، کسی ،مسجد کی چوکھٹ کے باہر بیٹھ جائے َ

'

اور تان لگائے ،

،

ہمارے سانسوں میں آج تک وہ حنا کی خوشبو مہک رہی ہے ۔

'

لیکن نہ جانے ، محلے کی کتنی حناؤں کے پوتے پوتیوں کے کان کھڑے ہوجائیں گے ۔

'

اِن کمبختوں کو کیا معلوم ، حنا کسے کہتے ہیں ۔

جسے بڑی بوڑھیائیں ایسے سل بٹے پر رگڑتی تھیں ۔

جیسے وہ اپنی بہوؤں کو رگڑتیں ۔
'

اب  حنا تو نہیں، البتہ مہندی کون میں ملتی ہے ۔