شگفتگو -نویں زعفرانی بزم مناثرہ

روداد: نویں زعفرانی بزم مناثرہ
تاریخ: 4 مئی 2019
مقام: ڈی ایچ اے ون، اسلام آباد

شگفتہ نثرخوانی کے ماہانہ سلسلے کی بزم مناثرہ کی نشست، جو گنتی کے اعتبار سے نویں تھی، 4 اپریل 2019 کو ڈی ایچ اے میں محترم نعیم الدین خالد صاحب کے گھر پر منعقد ہوئی۔ جس کی نظامت خلافِ معمول آصف اکبر صاحب نے کی۔
اس بار پروگرام کا وقت تین بجے کی جگہ 4 بجے رکھا گیا تھا، بلکہ جیسے روایتی طور پر سلامی میں سو روپے کی جگہ ایک سو ایک روپے دینے کی رسم تھی ویسے ہی نعیم صاحب نے وقت چار بج کر چار منٹ کا مقرر کیا اور جونہی گھڑیوں نے یہ سمے دکھایا آصف صاحب نے اپنے مضمون کی خواندگی سے محفل کا باقاعدہ آغاز کر دیا۔
بزم مناثرہ کے مستقل اراکین کے علاوہ معروف شاعر جناب قیوم طاہر بھی اس بار شریک محفل ہوئے جن کی گرمجوشی سے پذیرائی کی گئی۔ ان کے علاوہ فردوس عالم صاحب کی بیگم کو بھی تہہ دل سے خوش آمدید کہا گیا۔

درجِ ذیل شرکائے محفل گو کہ انگلیوں پر گنے جا سکتے ہیں، مگر ان کی قہقہہ بار تخلیقات سن کر یہ محسوس ہو رہا تھا کہ ان میں سے ہر ایک طنز و مزاح کا ایک معتبر نام ہے جو پھکڑ پن اور جگت بازی کے اس دور میں اردو زبان و بیان کی شگفتگی کا بیڑا اٹھائے ہوئے ہیں۔

شرکاء جنہوں نے بالترتیب مضامین سنائے،
-----------
آصف اکبر

ڈاکٹر عزیز فیصل

نعیم الدین خالد (میزبان)

حبیبہ طلعت

فردوس عالم 

عاطف مرزا 

قیوم طاہر -

-------------
پیش کیے گئے مزاح پرور مضامین سے احباب خوب ہی لطف اندوز ہوئے۔ شرکائے محفل نے قیوم طاہر صاحب سے وعدہ لیا کہ آئندہ نشست میں وہ اپنی مزاحیہ تحریر پڑھیں گے۔ ساتھ ہی محفل کے اختتام کے بعد ویلیو ایڈیشن کے لیے ان سے غزلوں کے اشعار بھی سنے۔ میزبان کے چائے، سموسے جلیبی اور سیڈوچز وغیرہ پر مشتمل لوازمات نے ان کی متواضع شخصیت کو مزید ہر دل عزیز بنانے میں کوئی کسر نہیں اٹھا رکھی۔ شرکائے محفل ذرا بھی جلدی میں نہیں تھے۔ بدقّت انہوں نے میزبان کو الوداع کہا۔ اور اس طرح یہ کامیاب محفل بزم مناثرہ کے ماضی کا ایک باب بن گئی۔
---------------------
احباب سے معذرت۔۔۔ کچھ بے پناہ مصروفیات اور نیٹ کے عدم تسلسل کے باعث روداد قدرے تاخیر سے پیش کی جا رہی ہے۔۔۔ شکریہ