بر صغیر کی ملکہ - مسور

 ملکہ مسور ، سے بوڑھے کا تعارف اوائل 1958 میں ہوا جب وہ ، نمّو تھا اور نوشہرہ میں اپنے والدین ، بڑی بہن اور چھوٹے بھائی کے ساتھ رہتا تھا ۔
ایک اتوار کا ذکر ہے ، نمّو اپنے آپا کے ساتھ ابّا کے کہنے پر شہر کی طرف ، میرون کوٹ پہن کر روانہ ہوا ، اِس کوٹ کی ایک خاص بات یہ تھی کہ کمر پر اَستر کے اندر ایک خفیہ جیب تھی ، جیسا کہ ماضی کے ایک بچے کی تھی ۔
تو نوجوانو! نمّو کی کمر کی خفیہ جیب میں ایک رسالہ ڈالا جاتا ، نمّو کو ہدایت دی جاتیں کہ بلکل سیدھا حکیم صاحب کے گھر جانا اور سیدھا واپس آنا ۔ اِس کا مطلب یہ نہ تھا کہ ، نمّو کو ٹیڑھا (دائیں) میڑھا (بائیں )  چلنے کی عادت تھی ۔ 

دراصل اُن دنوں ، "الاعلیٰ کے ابُو"  کی جماعت پر مکُی دور گذر رھا تھا ۔ چنانچہ ایک نئے فرقے کے بانیوں کے لئے یہ احتیاط لازم تھی ۔ یہ فرقہ خود کو راہ راست پر سمجھتا تھا اور باقی سب کو بھٹکے ہوئے مسلمان ۔ اب بھی یہی حال ہے ۔ دیگر مسلمان اِنہیں وہابی کہتے جو ایک گالی سے کم نہیں سمجھا جاتا تھا ۔

گھر سے باہر نکلتے ہی  نمّو معتبر ہوجاتا ، کیوں کہ ابّا کے فرمان خصوصی کے مطابق ، گھر سے باہر بھائی ، بہنوں سے بڑے ہوتے ہیں - یوں چینج آف کمانڈ کی غیر تحریری کاروائی ہوتی ، جسے آپا اکثر ماننے سے انکار کرتی ، یوں نمّو ہمیشہ آپا کے بائیں ھاتھ پرہی رہا ؛ گھر کے اندروہ اپنی پوری کمانڈ کی دھاک بٹھاتی اور گھر سے باہر وہ  نمّو کمانڈ کو صرف ایک لفظ " آپا" کی ادائیگی سے خاطر میں نہ لاتی ۔
خیر آپا اور نمّو اپنے  گھر کے پاس گذرنے والی سڑک پر گیٹ سے گذر کر جاتے ، جہاں ایک سنتری کھڑا ہوتا ، جہاں سے ٹھیک 500 گز دور سڑک کے دائیں کنارے فٹ پاتھ پرایک درخت تھا جس کے پاس حکیم صاحب کی دکان تھی اور اوپر گھر ، جس کادروازہ پچھلی گلی میں تھا ۔ جہاں پہنچ کر  نمّو کا پہلا مشن ختم ہوجاتا ۔
یہ سڑک ، نوشہرہ ریلوے سٹیشن سے آتی اور حکیم صاحب کی دکا ن کے سامنے سے گذرتی آخر میں بائیں طرف زیارت کاکا صاحب اور دائیں طرف نوشہرہ کشتیوں کے پل پر جی ٹی روڈ کو کراس کرتے ہوئے جاتی ۔

تو توجوانو ، جب  نمّو اور اُس کی آپا مہینے میں ایک دفعہ جاتے تو خالہ جان اُنہیں کھانا ضرور کھلاتیں ، اُس اتوار  نمّو نے بالکل ایسی   ہی چٹخارے دار دال کھائی تھی ، جس میں اِملی بھی تھی ، آپا کو تو پسند نہ آئی ۔ لیکن  نمّو نے ، چنیی سٹک کی طرح ، اپنی انگلیوں کی سٹک سے مزے لے کر کھائی ۔کوٹ تو اتار دیا تھا ، خالہ نےدونوں آستینیں اوپر چڑھا دی تھیں ،  دال انگلیوں سے بہتی ہوئی  کلائی  سے لپٹتی اور کہنی تک جانے سے پہلے  ہی نمّو چاٹ لیتا ،   پلیٹ کو بالکل اچھی طرح صاف کیا ، کہ ملکہ مسور کے فراک کے  گھسیٹنے کا نشان بھی  پلیٹ پر نہ رہا ،  انگلیوں کو بھی مزے سے  چاٹا ۔
خالہ (حکیم صاحب کی بیگم) سے پوچھا ، تو معلوم ہوا یہ ملکہ مسور ہے ۔ اور  نمّو نے یہ دال بھی پہلی دفعہ دیکھی ، کیوں کہ  نمّو کے گھر جو دال سرکاری سٹور سے آتیں وہ آدھی ہوتی تھیں، جن سے لال رنگ جھانک رہا ہوتا ، امّی دال چھلکوں سمیت پکاتی تھیں ، اُمّی کے بقول اصل غذایت چھلکوں میں ہوتی تھی ، مہمان آتے تو امّی دھلّی دال (چھلے بھگوکرا تارے ہوئے ) پکاتیں ۔
گھر آکر امّی کو بتایا ،
"ہاں ، حیدر آبادی دال ہو گی "،
امی بولی، "حیدرآبادی بہت کھاتے ہیں"
 نمّو سمجھا، کہ شاید یہ بھی کوئی ایسی دال ہے جسےحیدرآبادی کے علاوہ دوسرے نہیں کھا سکتے -

جون میں،  نمّو اپے والدین اور بہن بھائیوں کے ساتھ اپنی دادی سے ملنے میرپورخاص روانہ ہوا ، راولپنڈی چھوٹے ماموں، عبدالحنیف خان یوسف زئی ،  کے ہاں دو دن ٹہرے ،مجبوری تھی کیوں کہ ٹرین راولپنڈی سے آگے نہیں جاتی تھی ، وہاں سے لاہور کی ٹرین لینا پڑتی تھی ۔ ہمارے بچپن میں ٹرین جنکشن ٹو جنکشن چلتی تھیں ، بڑا مزہ آتا  تھا ۔  اب بچوں کے لئے کیا مزہ ، پشاور سے بیٹھو اور کراچی سٹی جا اترو ۔ ۔  ۔۔  !!
لاھور 3 دن ٹہرے کیوں کہ ساتھ ممانی اور اُن کے تین بچے بھی ساتھ ہولیے ۔ لاہور میں ممانی کے امی ابو رہتے تھے ۔ لاہور سے بہاولپور پہنچے ، جہاں  نمّو کے منجھلے ماموں  عبداللہ خان یوسف زئی ،مہاجر کالونی میں  رہتے تھے وہاں ایک ہفتہ گذارا ۔
بہاولپور سے نوابشاہ پہنچے جہاں  نمّو کے بڑے ماموں  عبدالحکیم خان  یوسف زئی رہتے تھے ۔ ہفتہ گذارنے کے بعد ، نوبشاہ سے ،چھوٹی ریل سے  نمّو اپنے والدین کے ساتھ میرپورخاص دادی کے گھر پہنچا ۔
وہاں ،  نمّو نے وہی ملکہ مسور کھائی ۔  نمّو کو شدید حیرانی ہوئی اور چلایا ،
" دادی یہ تو حیدر آبادی کھاتے ہیں !"
" ارے پوٹے کیا ہم حیدرآبادی نا ہوئیں "
نمّو کی ماں تو اجمیری تھی ۔ لیکن بیوی حیدرآبادی ملی ۔
پھر  نمّو کو معلوم ہوا کہ بیویاں تو کھانوں کا ذائقہ ہی بدل دیتی ہیں ۔ 

٭٭٭٭٭٭٭٭٭٭٭٭٭٭٭٭٭٭٭ 

مزید پڑھیئے  

یہ منہ اور مسور کی دال

مزدوروں کی دال - ملکہ مسور