چم چم ، بوڑھا اور دُبئی

٭٭٭٭٭٭٭٭٭٭٭٭٭٭

چم چم کے ساتھ دُبئی چلو

چم چم کے ساتھ دُبئی چلو

 چم چم کے امتحان شروع ہونے سے پہلے ، چم چم کو یہ پریشانی ستانے لگی کہ وہ   ، اِس دفعہ دُبئی جائے گی کیوں کہ وہ بابا کے ساتھ دُبئی گئی تو زیادہ نہیں گھومی تھی۔ کافی چیزیں دیکھنے سے رہ گئیں تھیں ۔ 

لیکن مسئلہ یہ تھا کہ اُس کی ماما   رمضان میں پاکستان  افطاری  کے پکوڑے کھانے آنا  چاہتی تھی اور واپسی پر  وہ چم چم کو اپنی ساتھ لے جاتی ، یوں چم چم دُبئی دیکھنے سے رہ جاتی ۔  چم چم کی ماما نے اُسے کہا کہ اگر  سب یعنی   برفی اور اُس کی ماما  و بابا ،  عوّا (خالہ )،  نانو اور آوا   سب ملک کر دُبئی آئیں۔ تو وہ دُبئی 15 دن کی چھٹی لے کر آسکتی ہے ۔

کافی سوچ و بچار   کے بعد  برفی کے ماما اور بابا  چھٹی نہ ملنے کی وجہ سے رہ گئے ، یوں   20 اپریل 2018 کو یہ قافلہ     10:30 پر اسلام آباد ائر پورٹ   چکلالہ پہنچ گیا ۔

ایمبارکیشن کے بعد  سی آئی پی  لاونج میں پہنچے ، اور چم چم کو بھوک لگ گئی کیوں کہ دُبئی جانے کی خوشی میں اُس نے ناشتہ نہیں کیا  اور یہ فیصلہ کیا کہ وہ ماما کے ساتھ دُبئی میں ناشتہ کرے گی خوشی میں وہ یہ بھول گئی کہ نانو کے گھر سے دُبئی ائرپورٹ پہنچنے میں کم از کم  8 گھنٹے لگیں گے ۔ جن میں ساڑھے تین گھنٹے تو جہاز میں بیٹھنے تک لگیں گے ۔ 

چم چم    سی آئی پی لاونج میں پہنچتے ہی اپنا بیگ رکھ کر کھانے کے کاونٹر کی طرف بڑھی ، اپنی پلیٹ میں  دو پیٹیز ڈالیں اورنانو کے پاس آکر بیٹھ گئی ۔ 

 کافی دیر نانو اور خالہ کے پاس  بیٹھ کر پلان بناتی رہی کہ   دُبئی میں سب سے پہلے کیا دیکھا جائے گا ؟   
پھر بور ہو کر بوڑھے کے پاس آکر بیٹھ گئی ،۔
" آوا ، ہم جہاز میں کب بیٹھیں گے ؟ " سوال کیا ۔
" تقریباً آدھے گھنٹے کے بعد کیوں کہ جہاز نے 1:30 پر فلائی کرنا ہے" ۔بوڑھے نے جواب دیا ۔
 12:00 اعلان ہوا ، کہ  فلائیٹ نمبر پی اے -210 سے دُبئی جانے والے مسافر   جہاز میں بیٹھنے  کے لئے تیار ہوجائیں ،
چم چم نے خوشی سے ایک نعرہ مارا اور اپنا  ٹیڈی بیئر " پنکیلینا " لے کر بیگ سنبھالنے کے لئے دوڑی  اور سب سے پہلے لاونج سے نکلی ۔ ہم چاروں پسنجر  ٹرانسفر بس میں بیٹھ کر جہاز میں جابیٹھے ۔  چم چم اپنی خالہ کے ساتھ کھڑکی کے ساتھ بیٹھی تیسری سیٹ پر بڑھیا اور راستے کے بعد چوتھی سیٹ پر بوڑھے کو بٹھایا گیا ۔ 

  بڑھیا نے جہاز میں بیٹھتے ہی چم چم کو دعائے سفر پڑھنے کا کہا ۔
" نانو ، میں نے گھر سے چلتے وقت پڑھی تھی نا "  چم چم نے اعتراض کیا ۔
" وہ تو کار کے لئے تھی اب جہاز کے لئے پڑھو " چم چم کو فوراً اپنا ماما کے ساتھ دُبئی کا سفر یاد آگیا  ، جب اُس نے پوچھا ،
" ماما ، کیا یہ جہاز گر سکتا ہے ؟ "
چم چم نے فوراً دُعائے سفر پڑھی اور بوڑھے کو بھی کہا کہ وہ بھی دعائے سفر پڑھے ۔جہاز اُڑتے ہی چم چم کو فوراً نیند آنے لگی اُس نے خالہ کی گود میں سر رکھا اور نانو کی گود میں پیر اور آرام سے آنکھیں بند کر کے نیند کی وادیوں سے  گذرتے ہوئے ماما کے پاس پہنچ گئی ۔ 
کھانا آیا تو چم چم کی آنکھ کھل گئی ، چم چم کی ماما ، ایسٹ تِمور سے وایا سنگا پور  2:00 بجے دُبئی پہنچ چکی تھی اور ائر پورٹ پر چم چم اور ہم سب کا انتظار کر رہی تھی ۔ 

 پاکستان کے وقت کے مطابق 5:00 بجے جہاز نے لینڈ کیا ، دُبئی پاکستان سے ایک گھنٹہ پیچھے ہے لہذا اپنی گھڑی اور موبائل کے وقت کو ایک گھنٹہ پیچھے کیا ۔ جہاز سے نکلے  تو  ، چم چم کی ماما کا میسج پڑھا کہ وہ ائرپورٹ کے اندر باہر نکلنے والے دروازے کے دائیں طرف کافی شاپ پر ہمارا انتظار کر رہی ہے ۔ اورارسلان  (بڑا بیٹا )  کار لئے باہر کھڑا ہے ۔

چم چم کی ماما نے ارسلان کو فون کیا ۔ اُس نے ہدایات دیں کہ پارکنگ میں آجائیں ۔
میں اور بڑھیا ، ارسلان کے ساتھ بیٹھے  ، چم چم ، اُس کی ماما اور خالہ   ٹیکسی میں بیٹھے ۔ ہم سب   مانچسٹر   اپارٹمنٹس  کے لئے روانہ ہوگئے ، جو جمیرہ  لیک ٹاورز کے علاقے میں واقع ہے  ۔ 

جس کی ساتویں منزل پر  ، لڈو اور چیکو کی ماما ہمارا انتظار کر رہی تھی ۔
  ارسلان 2010 میں دبئی آیا تھا  جہاں اُس کو جاب ملی تھی  2017 میں وہ  دُبئی سے فجیرہ دوسری کمپنی میں آگیا ۔  لڈو اور چیکو دُبئی میں پیدا ہوئے ۔  کافی عرصے سے ارسلان ہم دونوں کو بُلا رہا تھا لیکن اپنی صحت  کی وجہ سے ہم جہاز کا سفر نہیں کرنا چاہتے تھے ، ہمارا جھاکا چم چم اور اُس کی ماما نے زبردستی دور کیا اور اِس بوڑھے اور بڑھیا نے ، چم چم کے ساتھ  اسلام آباد۔لاہور۔سری لنکا ۔سنگاپور اور ایسٹ تِمور کا سفر کیا ۔ 
پڑھیں:  بوڑھے اور بڑھیا کی مشرق بعید کی چھان پھٹک ۔

 چم چم کی خواہش تھی کہ وہ فوراً دُبئی گھومے  ، بوڑھے اور بڑھیا  سفر کی تکان کی وجہ سے فلیٹ  میں رہنا چاھتے تھے ۔یہ طے پایا کہ ارسلان  کہ بس آج نیچے جاکر کھانا کھایا جائے گا ۔ بوڑھا تو سو گیا ، جب اُٹھا تو معلوم ہوا کہ سب ہی سوگئے تھے ، باہرتاریکی چھائی ہوئی تھی کچن میں  کھڑبڑ سنائی دی ، جاکر دیکھا تو  بڑھیا اور چھوٹی بیٹی چائے بنانے کی تیاری کر رہی تھیں ۔  

چم چم اور اُس کی ماں کافی دیر بعد اُٹھیں کھانا باہر کھانے کا پروگرام کینسل ہوگیا ، کھانا اپارٹمنٹ میں منگوالیا گیا ۔ البتہ کھانے کے بعد   واک کا پروگرام بنا   ۔ 

صبح اُٹھا  کھڑکی سے باہر نظر ڈالی   جو منظر دیکھا آپ بھی دیکھیں  ۔

 چم چم کے ساتھ دُبئی کی بے تحاشا سیر  کا حال اگلی قسطوں  میں ۔

 ٭٭٭٭٭٭٭٭٭٭

٭ -  چم چم ، بوڑھا اور دُبئی 

ہماری عبادات میں فرق کیوں ؟

   مھجور  القرآن  ، مھجور عبادات۔

٭٭٭٭٭٭٭٭٭٭٭٭

 

چیف جسٹس کے نام کھلا خط !

شعور سے تحت الشعور میں چھلانگ

 کل بہت سے پرانی تصاویر کے ساتھ یہ تصویر بھی وٹس ایپ ہوئی -

تصویر نے کسی ماہر غوطہ خور کی طرح  شعور سے تحت الشعور کی تاریک گہرائیوں میں چھلانگ لگائی  ۔

اور گوگل کی طرح ، اِس سے ملتی جلتی تصویر نکال لائی ۔جو  قبل از  60 کی دھائی میں بالکل اِسی طرح  سبق حفظ کرنے   کی یاد    کی اِس بوڑھے کی تھی ، بس فرق یہ ہے کہ اُس وقت مُرغا بنے اِن بچوں کے سامنے  کتاب نہیں ، بلکہ تختی  ہوتی تھی ۔ جس پر سبق ہوتا یا پھر  کوئی " رٹّو " بچہ پڑھتا اور ہم سب اُسے  روہانسی آواز میں دھراتے  جاتے ۔
یہ کچی پکی کا نہیں ، بلکہ پہلی  کلاس اور اُس کے بعد کا دور تھا ، کچی اور پکّی میں  تو ، نرسری یا کے جی ، کلاس کی طرح ، نہ کتاب  تھی اور نہ قاعدہ ، بس موجیں، ہی موجیں  تھیں ۔1959 کی سردیوں میں دھوپ میں سورج  تلے   زمین پر  اور گرمیوں میں ،  گورنمٹ برکی سکول  ، اے ایم سی سنٹر ایبٹ آباد کے ، گاڑیوں کے بڑے سے شیڈ   کے نیچے  بیٹھ کر کچی اور پکّی  ایک ساتھ پڑھی ۔
پھر ابّا کی ٹرانسفر    ، نوشہرہ ہو گئی ۔ دوبارہ پھر برکی سکول میں  1964 میں  چوتھی کلاس  میں واپسی ہوئی ۔

مضمون لکھا جا رہا ہے 

اعلیٰ ظرف اور کم ظرف !

 روح القدّس نے محمدﷺ کو اللہ کا پیغام دیا :

ضَرَبَ لَكُم مَّثَلًا مِّنْ أَنفُسِكُمْ ۖ هَل لَّكُم مِّن مَّا مَلَكَتْ أَيْمَانُكُم مِّن شُرَكَاءَ فِي مَا رَزَقْنَاكُمْ فَأَنتُمْ فِيهِ سَوَاءٌ تَخَافُونَهُمْ كَخِيفَتِكُمْ أَنفُسَكُمْ ۚ كَذَٰلِكَ نُفَصِّلُ الْآيَاتِ لِقَوْمٍ يَعْقِلُونَ - ﴿30:28﴾ 

ا س (الکتاب) میں تمھیں سمجھانے کے لئے تم ہی میں سے مثال بیان کی ہے۔
کہ کیا تمھارے ماتحت اس رزق میں تمھارے برابر کے شریک ہیں جو ہم نے تم کو دیا ہے؟۔
جس طرح وہ تم سے ڈرتے ہیں کیا اسی طرح تم برابری میں ان سے بھی ڈرتے ہو؟
اس طرح ہم اپنی آیات عقل والوں کے لئے تفصیلاّ بیان کرتے ہیں ۔

شناختی نمبرسے آپ کی پہچان

صدرِ پاکستان نے ایک آرڈیننس کے ذریعے ، آپ کے شناختی  نمبر کو آپ کا انکم ٹیکس نمبر  بھی بنانے کا حکم دے دیا ہے ۔
اب آپ ، اپنی کوئی بھی رقم  بنک میں اس وقت جمع کروا سکیں گے جب آپ انکم ٹیکس میں بھی رجسٹر ہوں گے ۔
چنانچہ تمام بڑی رقم جمع کروانے والے ، خود کو بحیثیت انکم ٹیکس فائلر رجسٹر کروائیں ۔
حکومت کو چاہیئے کہ بجائے کوئی فارم جمع کروانے کے لئے  ، بذریعہ  موبائل ایس ایم ایس سے ،
1- فائلر کی رجسٹریشن کا انتظام کرے ،
2- ایف بی آر ، اِس طرح رجسٹر ہونے والے ، کو اپنے شناختی نمبر سے لاگن ہونے کے لئے ، پاس ورڈ بھجوائے ۔
3-بحیثیت انکم ٹیکس رجسٹر ہونے والا فرد ، ویب سائٹ پر لا اِن ہونے کے بعد اپنی معلومات اَپ ڈیٹ کرے ۔
4- تاکہ بحیثیت ایکٹیو انکم ٹیکس فائلر ،   قومی دھارے میں شامل ہوجائے ۔

 

٭٭٭٭٭٭٭٭٭٭٭٭٭٭

حلال و حرام !

خواجہ ناظم الدین کا ناظم آباد

 پاکستان بنا تو مہاجروں کے لٹے پٹے قافلوں نے کراچی کا رخ کیا۔۔۔۔۔۔۔

 ایک وقت تھا جب یہ عروس البلاد کراچی لسبیلہ کے پل سے اُدھر ہی ختم ھوجاتا تھا اور خاصی چوڑی اور بہت کافی جوش و خروش سے جھاگ اڑاتی لیاری ندی کراچی کے باسیوں کے لئے حد آخر تھی جہاں لوگ اکثر بنسیاں ڈالے سگرٹ کے مرغولے اڑاتے مچھلیوں کا شکار کرتے نظر آتے تھے، لیاری ندی کے اُس پار دور تلک لق و دق سنسان علاقہ تھا جس میں جنگلات تھے اور جہاں گیڈر، لومڑی اور دوسرے جنگلی جانوروں کا بسیرا تھا ۔

  پاکستان کے گورنر جنرل خواجہ ناظم الدین نے ھندوستان سے گھر لٹا کر آنے والے، اور کیمپوں میں رہنے والے  مہاجرین کے لئے ایک نئی بستی بسانے کا پلان کیا، یہ بستی لیاری ندی کی دوسری طرف یعنی کراچی کے باہر آباد کی گئی۔

حکومت نے یہ غیر آباد علاقہ ایک قبائلی سردار مستی بروہی خان سے خریدا اور یہاں کی زمین مہاجرین کو تین روپے پچاس پیسے فی اسکوائر یارڈ کے حساب سے بیچی گئی، یہ1952 کی بات ھے۔

 راج نے شاقول اور کیرنی سنبھالی، رنگسازوں نے برش اور رنگوں کی بالٹیاں اٹھائیں فولاد کے بیوپاری لوھے کے ٹرکس بھر بھر کر لانے لگے سمنٹ ریت اور فولاد کے گارے سے مکان بنے، مہاجرین کی پہلی نسل کے مردوں نے مکان بنا کر اپنا فرض پورا کیا اور یوپی کی سگھڑ بیبیوں نے ان مکانوں کو گھر بنا دیا، صحنچے، دالان برامدے گملوں سے اٹ گئے، باھر گھاس کے تختوں کے پاس کی کیاریاں بگن ویلیا رات کی رانی اور عشق پینچاں کے پھولوں سے سج گئیں، گھر کے پچھواڑے میں کدو لوبیا سیم کی بیلوں نے دیواروں کو ڈھک دیا، ٹماٹر میتھی ھرا دھنیا اور پودینے کے ھرے بھرے پودوں کی مہک سے رسوئی خانے مہکنے لگے، کسی نے اپنے گھر پر نشیمن لکھوایا، کسی نے کہکشاں، کوئی کاشانہ بتول لکھوا کر شاد ھوا اور کوئی مصطفے منزل پر قانع ھو گیا۔

 یہ سارے نام ان کے ماضی کا دین تھے وہ گھر جو مہاجرین ھندوستان میں نے اپنے پیچھے چھوڑ آئے تھے، یہ صرف ان کے ماضی سے جڑی یادوں کو خراج تحسین ہی نہ تھا بلکہ نئی سرزمین میں اپنی ذاتی ملکیت کے احساس کا اطمینان بخش اظہار بھی تھا، دیکھتے دیکھتے ہی ناظم آباد کراچی کے الائیٹس کی محبوب بستی بن گیا ۔

یہ تو دنیا کے سب ہی لوگ جانتے ھیں کہ کراچی کے نہایت ذھین فطین اور باصلاحیت لوگوں کا قیام ناظم آباد میں ہی رھا۔ ۱۹۵۰ سے ۱۹۷۰ تک ناظم آباد انٹلیکچولز کی رھائش گاہ اور کلچرل ایکٹیویٹیز کا گڑھ تھا، پی آئی بی کالونی، آگرہ تاج کالونی اور بہار کالونی کے پڑھے لکھے لوگوں نے ان علاقوں کو خیر آباد کہہ کر ناظم آباد میں نئے سرے اپنی زندگی شروع کی۔ لمبی چوڑی دو رویہ سڑکیں جن کے ساتھ دور تک درختوں کی قطاریں سایہ شجر دار کا نمونہ پیش کرتی تھیں پورا علاقہ اپنی صفائی ستھرائی کھلے میدانوں اور تازی ھوا کے جھونکوں کی وجہ کراچی کے دوسرے علاقوں سے منفرد تھا اور جلد ہی کراچی کے پوش ایریاز میں شمار ھونےلگا، ایک وقت آیا جب ناظم آباد میں گھر بنانا صاحب حیثیت ھونے اور تعلیم یافتہ ھونے کا سمبل بن گیا کراچی کے دوسرے علاقوں کے باسی ناظم آباد والوں کو مہذب تعلیم یافتہ اور انٹلکچول سمجھتے اور انکی خوش لباسی اور صلاحیتوں سے مرعوب بھی ھوتے، لوگوں نے ناظم آباد کو فرانس کے شہر پیرس میں واقع مونٹ پارناسے نامی علاقے کا ھم پلہ قرار دیا جہاں ایک ہی وقت میں بیکیٹ، پیکاسو، ھیمنگوے، روسو، عذرا پاؤنڈ اور سلازار جیسے بہت سے دانشور اور آرٹسٹ، رقاص، مجسمہ ساز، مصور، شاعر، اور کمپوزر رھا کرتے تھے، گنگا جمنا تہذیب کا جتنا شہرہ ھے اگر اس تہذیب کا نمونہ دیکھنا ھے تو یہاں آباد گھرانوں کے مکینوں سے ملئے، جسٹس لاری، تنقید نگار فرمان فتحپوری، فلم ساز سعید رضوی، عالیہ امام، مجاھد بریلوی، مجنوں گورکھپوری ، مختار زمن، ڈاکٹر سرور، ذکیہ سرور، ڈاکٹر طیب، کالمسٹ نصر اللہ خان، اقبال دیوان، سید شرف الدین شرف، انعام درانی، کون کون یہاں نہیں رھتا تھا، صادقین، اقبال مہدی، محسن بھوپالی، سنگیتا، زیبا،ندیم شکیل حنیف محمد، اقبال صفی پوری، سحر انصاری اور سلمی زمن جیسے انٹلیجنسیا، رائیٹرز، پوئٹس ارٹسٹ اسکالر، سول سرونٹ، سیاستداں، ڈاکٹرز، گلوکار، وکیل، تعلیمی ماھرین۔ یہ سب لکھنئو، دہلی، امروہہ، کانپور، بدایوں، علی گڑھ، ملیح آباد، حیدرآباد، جونا گڑھ سے ھجرت کئے ھوئے نابغہ روزگار لوگوں کی پہلی نسل تھی۔ سرسید گرلز کالج ، ناظم آباد اسکولُ، ناظم آباد کالج ، عثمانیہ کالج، ھیپی ڈی اسکول، خان صاحب کا پریمیئر کالج، حورانی صاحب کا سٹی کالج، عبدللہ کالج، رابعہ زبیری کا کراچی اسکول آف آرٹ اینڈ کرافٹ، وسطانیہ اسکول کے علاوہ لڑکیوں اور بچوں کی لاتعداد نرسریاں اور اسکول کھلے اور کراچی کے دوسرے علاقے کے قدیم اور معتبر تعلیمی اداروں سے ٹکر لینے لگے ناظم آباد کے اندر چھوٹے چھوٹے ناظم آباد بن گئے، گولیمار، عثمانیہ کالونی فردوس کالونی، رضویہ سوسائیٹی، مسلم لیگ کوارٹرز، پاپوش نگر اور بڑا میدان، جن کی اپنی آبادی چھوٹے شہروں کے برابر تھی، انو بھائی پارک، ھادی مارکیٹ، گول مارکیٹ، ضیاء الدین اسپتال بقائی اسپتال صادقین ھاؤس ، سبطین منزل، محسن منزل اور حکیم سعید کی ھمدرد لیباریٹریز کا صدر دفتر ھمدرد سینٹر اس علاقے کے لینڈ مارک تھے اور پاک کریسنٹ کرکٹ کلب جہاں سے حنیف محمد، وزیر رئیس مشتاق اور صادق محمد نے کرکٹ کھیلی، ظہیر عباس اور آصف اقبال اس کلب سے کھیل کر فخر محسوس کرتے تھے، صلاح الدین سلو اور انتخاب عالم، نیشنل کرکٹ کلب کے قریب رھتے تھے جبکہ رضویہ سوسائیٹی کی ٹیم ڈائمنڈ کرکٹ کلب کا مشہور اسپن بولر محمود الحسن تھا۔

 آغا جوس ھاؤس، انبالہ سوئیٹ، ملا حلوائی، کیفے ذائقہ،الحسن کافی ھاؤس اور کیفے وزیر کے خوش ذائقہ کھانے دلّی اور اودھ کے کھانوں اور مٹھائیوں کو مات دیتے تھے، کیفے وزیر میں جو دن میں بائیس گھنٹے کھلا رھتا تھا ایک آنے کی چائے ایک روپے پچاس پیسے کا چکن تکا اور چار آنے کی نہاری ملتی تھی، ایک پیالی چائے عوض آپ اپنے دوستوں کے ساتھ دو گھنٹے بیٹھ کر جمیل الدین عالی،عصمت چغتائی، کرشن چندر، جیلانی بانو، جوش اور اداس نسلوں کے خالق عبدللہ حسین کے علاوہ رونا لیلی، ناھید اختر، خورشید انور، ندیم وحید مراد اور شمیم آرا پر بحث و مباحثہ کر سکتے تھے۔

 ناظم آباد کلب اہل ناظم آباد کا ریلیکسییشن پوائنٹ تھا اور پھر غالب لائبریری تھی جس میں تین ھزار سے زیادہ کتابیں تھیں اور جس کو حبیب بنک نے فیض احمد فیض اور مرزا ظفر الحسن کی کوششوں سے بنایا گیا تھا ، اس زمانے میں یہ ادبی تقریبات کا مرکز تھی۔

 فلمی تفریحات کے لئےریلیکس سینما، نایاب سینما، شالیمار سینما لبرٹی سینما تھے جہاں شرفائے ناظم آباد اپنی فیملیز کے ساتھ فلم دیکھنے جاتے، میٹنی شوز میں گھریلو خواتین اور نوجوان لڑکیوں سے ھاؤس فل ھوتا، لڑکیاں بالیاں اپنی پڑوس اور کالج کی سہیلیوں کے ساتھ بے خوف خطر فلمیں دیکھتیں ۔مگر کبھی کسی قسم کی بیہودگی یا خواتین کے ساتھ بدسلوکی کی شکایت سننے میں نہیں آتی تھی۔

 ان دنوں گرمیوں میں گھر کے دالان صحن اور چھتوں پر سونے کا عام رواج تھا کھڑکیاں کھلی رکھی جاتیں جن سے فراٹے بھرتی ھوا پورے گھر کو فیضیاب کرتی، چوری چکاری، اسٹریٹ کرائمز ڈاکے کلاشنکوف جیسی چیزوں کا نہ ڈر تھا اور نہ کوئی تصور تھا۔ پھر محرم آتا تو زیڈ اے بخاری اور رشید ترابی کی مجلسوں اور شہدائے کربلا کے اذکار سے ناظم آباد کی گلییوں میں سوگواروں کے جھمگھٹے لگ جاتے، سبیلیں لگتیں لڑکے لڑکیاں سیاہ لباس پہنے ایک گھر سے دوسرے گھر مجالس میں شریک ھونے جاتے اور مجال ھے کوئی شیعہ سنی کے اختلاف کی بات بھی سنی گئی ھو۔ 

چراغوں کا دھواں ھوگئے ھیں، وہ زمانے رفتگاں ھو گئے ھیں، آج یہ سب باتیں ایک خواب سا لگتی ھیں مگر جو لوگ ان سنہرے برسوں میں ناظم آباد کی اس گولڈن لائف کا حصہ رھے ھیں وہ آج بھی ایک ٹھنڈی سانس بھر کر اس یادگار دور کو یاد کرتے ھیں اور گنگناتے ھیں کہ قصہ ناظم آباد مرحوم کا اے دوست نہ چھیڑ۔۔۔۔۔۔۔ ٭٭٭٭٭٭٭٭٭٭٭٭٭٭٭٭٭