ایتھوپیا کا نائی، کرو-نائی ماحول میں

جنوری میں  کی 5 تاریخ کو  اسلام آباد سے عدیس ابابا آنا پڑا ۔   
14 مارچ کو چم چم (نواسی) کی سالگرہ تھی ۔ بڑھیا نے  10 مارچ کو وارننگ دی کہ آپ کی بال بہت بڑھ گئے ہیں ، کٹوا لیں  ۔
"نہیں ٹھیک ہیں زیادہ نہیں بڑھے " میں نے جواب دیا ۔
"نہیں بُرے لگ رہے ہیں ، کٹوا لیں لوگ یا کہیں گے " بڑھیا بولی ۔
" کون سے لوگ ؟" میں نے اکتائے ہوئے لہجے میں پوچھا 
" ارے وہی جو سالگرہ پر آئے  گے " بڑھیا بولی '
" وہ کون سا میرے رشتے کے لئے آرہے ہیں " میں نے جواب دیا۔
" کچھ خدا کا خوف کرو ، اِس عمر میں بھی رشتے کا سوجھ رہا ہے ؟" بڑھیا  نے جھاڑا ۔
" جب ، اِس عمر میں  مصطفیٰ کھر اپنی گود میں اپنے ڈیڑھ سال کے بچے کو اُٹھا سکتا ہے ، تو میں نے کیا جرم کیا ہے ؟ ویسے بھی جب میں نے آپ کے کہنے پر  ، ایتھوپیئن نائی سے بال کٹوائے تھے تو اُس نے کون سا ہیرو بنا دیا تھا ؟" میں نے جوابی وار کیا ۔
" اچھے تو بال کاٹے تھے ، ایتھوپیا میں وہی کٹ کاٹیں گے جو یہاں کا رواج ہے " بڑھیا بولی ۔
" پپا ، آپ ہلٹن چلے جائیں وہاں کا باربر اچھا ہے " بیٹی نے رائے دی ۔
" وہاں کیا خوبی ہے ؟ ہے تو وہ بھی ایتھو پیئن " میں نے جواب دیا ۔ 
" آپ انجوائے کریں گے "۔ یہ کہہ کر اُس نے ہلٹن فون ملایا  اور 13 تاریخ شام 3 بجے کی بکنگ کروا دی ۔
" ارے بھئ  آج کیوں نہیں ؟" میں نے پوچھا ۔
" پپا وہاں ، اپائنٹمنٹ لینا پڑتی ہے " بیٹی بولی ۔
" اُنہوں نے بال کاٹنے  ہیں یا دانت نکالنا ہے " میں نے پوچھا ۔
" شکر کریں ، آپ کو تین دن بعد اپائنٹمنٹ مل گئی عورتوں کو ہفتہ پہلے بکنگ کروانا پڑتی ہے " بیٹی بولی ۔ 
13 تاریخ  کو بیٹی کو میسج آیا ،" آپ کی اپائنٹمنٹ منسوخ ہو گئی ہے ، آئیندہ تاریخ آپ کو بتا دی جائے گی ۔
چنانچہ اِس بوڑھے نے سکون کا سانس لیا ، ڈی ایچ اے ، ون میں ٹینکی کے نیچے نائی کی دُکان سے 100 روپے میں بال کٹوانے والا ،  400 ایتھوپیئن   روپوں میں بال کیسے کٹوا سکتا  ؟ 
چلو اب  چھٹی ، واپسی  اپریل میں دبئی جا  کر ، پاکستانی باربر سے بال کٹوائیں گے ۔ 
مارچ گذرا تو معلوم ہوا ایتھوپیا سے باہر نکلنے والے سارے راستے بند !
 اور بال تھے کہ روزانہ کے حساب سے بڑھ رہے تھے ۔ 
صبح سو کر اُٹھتا اور شیشے میں خود کو دیکھتا تو ایسا معلوم ہوتا جیسے رات کو بالوں میں بم پھٹا ہے ۔ 
کبھی دل میں آتا  کہ سر کو خود احتسابی کے عمل سے گذارا جائے ۔ لیکن پھر ڈر لگتا - کہ کہیں نیب کی طرح اگر احتساب کا عمل زیادہ ہو گیا ، تو سر منہ دکھانے کے قابل نہیں رہے گا ۔ 
آج کی بات ہے ، کہ بڑھیا نے تھیلا دے کر کہا : "یہ سامان لے آئیں " 
بوڑھا سامان لینے  محلّے کی مارکیٹ چلا گیا ، وہاں باربر کی دُکان پر  دیکھی کھلی ہوئی تھی -
تجسس کے مارے دکان میں گیا ۔ کوئی نہیں تھا ، واپس مڑا تو سامنے کافی شاپ پر بیٹھا نوجوان     تیزی سے میرے طرف بڑھا ۔  اور ٹوٹی پھوٹی انگلش میں پوچھا ۔
" بال کٹوانے ہیں ؟"
" جی ، مگر مجھے کرونا سے ڈر لگتا ہے " میں نے کہا ۔
" نو نو سر ۔ میرے پاس سینیٹائزر ہے ۔ آپ فکر مت کرو ۔ تمام سامان کرونا پروف ہے ۔ کل کمیٹی والے چیک کر کے گئے ہیں" اُس نے کہا ۔
اور بوڑھے کو کرسی پر بیٹھنے کو کہا ۔ 
نوجوان بارباربر سے سامان نکالا ، اُسے ایک ٹرے میں ڈالا اور ایک بوتل سے لکوئڈ اُنڈیلا ، کمرے میں سپرٹ کی بو بھر گئی ۔ پھر اُس نے میرے ہاتھوں پر سینی ٹائزر سے سرے کیا ، میرے بالوں پر سپرے کیا ، خود گلوز پہنے ، ماسک لگایا   ۔ ایک خود ساختہ چولہے میں سپرٹ ڈال کر آگ لگائی اور اپنی بال کاٹنے کی مشین  اور اُس کی لوہے کی گراری کو آگ سے گذارا ۔ 
آگ بند کرنے کے بعد اُس نے سپرے سے ماحول میں اُڑنے والے کرونا کے جراثیم کو نیست و نابود کیا-
بوڑھے نے کرسی کے ہینڈلز پر دو دفعہ سپرے کروایا       اور بوڑھے سے پوچھا ،
" کس قسم کی ہیر کٹ کرنی ہے " 
اور ہیر کٹ کےچارٹ کی طرف اشارہ  کیا ۔

بوڑھے نے غور سے تمام نوجونوں کے ہیر سٹائل کی تصاویر دیکھیں  اور سب سے نیچے بائیں سے دوسرے نوجوان کی طرف اشارہ کر کے کہا ،
" ایسی " اور بوڑھا  آنکھیں بند کرکے کرسی پر ٹیک لگا کر بیٹھ گیا ۔
مشین کی گھر گھر سے  تین ماہ کے بڑھے ہوئے بال گھاس کی طرح کٹ کر گرنے لگے ۔  
اُس نے بعد جو بوڑھے کا سر بنا ۔

وہ ایسا تھا ، نوجوان باربر  سے پوچھا ۔"
کتنے پیسے ؟"
" 50 بر " وہ بولا۔
کہاں 400 بر اور کہاں 50 بر ؟؟
چنانچہ مبلغ 100 ایتھوپئین بر ،  جو پاکستان کے مطابق 500 روپے تقریباً بنتے تھے دے  کر شکریہ ادا کرنے کے بعد سامان خرید کر گھر آیا ۔
بڑھیا نے درہازہ کھولا ، اور حیران ہو کر پوچھا ،
" یہ کیا ؟ کیا  ہیر کٹ کروائی ہے ؟ "
" جی ، بال بڑھ گئے تھے ، سوچا کروالوں" میں بولا ۔
"یہ کیسی کروائی ہے ؟ اِس سے بہتر تھا گنجے ہو جاتے " بڑھیا نے طنز کیا ۔
"اور آپ کو کرونا کا ڈر نہیں لگا "
" کرونا ، گنجا ہونے کے ڈر سے ایتھوپیئن نائی کی دکان میں نہیں گھستا "  میں نے جواب دیا۔
" کتنے بُرے بال کاٹے ہیں بد بخت نے" بڑھیا بولی "اچھا جائیں گرم پانی سے خوب نہائیں "
" ارے بیوی گھر کی کھیتی ہے  مہینے بعد پھر کٹنے کے قابل ہوگی " میں نے مزاحیہ انداز میں کہا 
" ٹھیک ہے اگلی دفعہ میں کاٹوں گی "  بڑھیا بولی 
" چالیس سال ہو گئے ہیں حجامت بناتے ہوئے اب بھی دل نہیں بھرا " یہ کہہ کر باتھ روم کی طرف بڑھ گیا ۔

تیا ر  کے بعد  شیشے میں دیکھا ،"کیوں دوستو !  بال کچھ بُرے نہیں کاٹے؟ "

٭٭٭٭واپس ٭٭٭

مزید پڑھیں :
٭-  شیرٹن ایتھوپیا کا سیلون اور ڈی ایچ اے کا سلون

٭- نائی چاچا سے گیسو تراش کا سفر  

 

٭٭٭٭واپس ٭٭٭